Keto diet cheat meals

Keto diet cheat meals

LCHF Keto diet cheat meal remedies: How to reach ketosis after a cheat meal

കീറ്റോ ഡയറ്റ് തെറ്റിച്ചാൽ എന്തൊക്കെയാണ് ചെയ്യേണ്ടത് ? ഡയറ്റിൽ ഉൾപ്പെടാത്ത ഭക്ഷണം കഴിച്ചാൽ എന്താണ് പ്രതിവിധി ?

കീറ്റോ ഡയറ്റ് ചെയ്യുന്നവരുടെ ഒരു പ്രധാന വെല്ലുവിളിയാണ് കീറ്റോസിസ് നിലനിർത്തുക എന്നത് . മറ്റു ഡയറ്റുകൾ പോലെ അല്ല കീറ്റോ ഡയറ്റ്. അത് ഒരു മെറ്റബോളിക് ഡയറ്റ് ആണെന്ന് മാത്രമല്ല, ശരീരത്തിന്റെ പല രോഗാവസ്ഥകളെയും കുറവുകളേയും ശുദ്ധീകരിക്കുകയും പുനഃസ്ഥാപിക്കുകയും ചെയുന്ന ഡയറ്റ് ആണ്. അതുകൊണ്ടു തന്നെ മറ്റു ഡയറ്റുകളിൽ ചെയുന്നത് പോലെ ഇടയ്ക്കിടെ ഉള്ള ചീറ്റ് മീൽ എന്ന ഒരു അവസരം ഇത്തരം ലോ കാർബ്‌ ഡയറ്റുകളിൽ ഇല്ല. അത് തന്നെയാണ് ഈ ഡയറ്റ് പിന്തുടരുന്നതിൽ നിന്ന് പലരെയും നിരുത്സാഹപ്പെടുത്തുന്നതും. എന്നാൽ ജീവിതകാലം മുഴുവൻ ചില രോഗങ്ങൾക്ക് മരുന്ന് കഴിച്ചു മടുത്ത ആളുകൾക്ക് ഇത്തരം ഡയറ്റ് ഒരു അനുഗ്രഹം തന്നെയാണ്. എന്നിരുന്നാലും നല്ല ഒരു റിസൾട്ട് ലഭിക്കാൻ കഠിനാദ്ധ്വാനം ആവശ്യമാണ്. ഡയറ്റിൽ ഉൾപ്പെടാത്ത എന്തെങ്കിലും ഒരു ഭക്ഷണം കഴിച്ചു കഴിഞ്ഞാൽ ഡയറ്റിൽ നിന്നും പുറത്താകാനുള്ള സാധ്യത വളരെ കൂടുതലാണ്. കീറ്റോസിസ് എന്ന് പറയുന്നത് വളരെ സെൻസിറ്റീവായ ഒരു മെറ്റാബോളിസം ആണ് . സാധാരണ മെറ്റബോളിസത്തിൽ നിന്ന് കീറ്റോസിസ് എന്ന മെറ്റബോളിസത്തിലേക്ക് എത്താൻ കുറഞ്ഞത് രണ്ടാഴ്ചയെങ്കിലും എടുക്കും. അതേസമയം കീറ്റോസിസ് മെറ്റബോളിസത്തിൽ നിന്ന് സാധാരണ മെറ്റബോളിസത്തിലേക്ക് മാറാൻ അരമണിക്കൂറോ ഒരു മണിക്കൂറോ മതിയാകും. എന്തെങ്കിലും ഒരു ചീറ്റ് മീൽ കഴിച്ചാൽ ഇത് സംഭവിക്കും. ഇത്രയും സെൻസിറ്റീവായ ഒരു മെറ്റബോളിസത്തെ സംരക്ഷിക്കാൻ അല്ലെങ്കിൽ നിലനിർത്താൻ എന്തെല്ലാം കാര്യങ്ങളാണ് ശ്രദ്ധിക്കേണ്ടത് ?

ലോ കാർബ് ഡയറ്റ് എടുക്കുമ്പോൾ കൂടുതൽ കൊഴുപ്പുള്ള ഭക്ഷണങ്ങൾ കഴിക്കുക എന്നതാണ് നമ്മൾ ആദ്യം തന്നെ ശ്രദ്ധിക്കേണ്ട കാര്യം. അശ്രദ്ധ മൂലം ഉയർന്ന കാർബോഹൈഡ്രേറ്റ് ഉള്ള ഭക്ഷണങ്ങൾ കഴിച്ചിട്ടുണ്ടെങ്കിൽ അത് പൂർണമായും ഒഴിവാക്കുക. ചീറ്റ് മീൽ കഴിച്ചാൽ രണ്ടുദിവസം തുടർച്ചയായി ഇൻറർമിറ്റന്റ് ഫാസ്റ്റിംഗ് പിന്തുടരേണ്ടത് ആവശ്യമാണ്. ഇൻറർമിറ്റന്റ് ഫാസ്റ്റിംഗിൽ തന്നെ 16 മുതൽ 24 വരെയുള്ള മണിക്കൂർ വ്യത്യാസത്തിൽ ഫാസ്റ്റിംഗ് പാറ്റേണുകൾ ഉണ്ട് . ഇതിൽ ഏതാണോ നിങ്ങൾക്ക് ചെയ്യാൻ എളുപ്പം അതാണ് പിന്തുടരേണ്ടത്. അടുത്തതായി ശ്രദ്ധിക്കേണ്ടത് കുറച്ചു കൂടുതൽ സമയം എക്സർസൈസ് അഥവാ വ്യായാമം ചെയ്യുന്നതിൽ ശ്രദ്ധ ചെലുത്തണം. 30 മിനിറ്റ് മുതൽ ഒരു മണിക്കൂർ വരെ തുടർച്ചയായി എന്തെങ്കിലും ഒരു എക്സർസൈസിൽ ഫോക്കസ് ചെയ്യേണ്ടതാണ്. കീറ്റോസിസ് എന്ന പ്രോസസ്സിനെ നിലനിർത്താനും സംരക്ഷിക്കാനും ആയി ഒരാഴ്ചയെങ്കിലും ഇതു തുടരണം.

MCT ഓയിൽ അഥവാ മീഡിയം ചെയിൻ ട്രൈഗ്ലിസറൈഡ് ഓയിലുകൾ കീറ്റോൺസിന്റെ ഉൽപാദനം വർദ്ധിപ്പിക്കുവാനായി ഉപയോഗിക്കണം. MCT ഓയിലിന് ഏറ്റവും മികച്ച ഉദാഹരണമാണ് നമ്മുടെ വെളിച്ചെണ്ണ. വെളിച്ചെണ്ണ ധാരാളമായി നമ്മുടെ ഡയറ്റിൽ ഉൾപ്പെടുത്തിയാൽ കീറ്റോൺസിന്റെ ഉൽപാദനം വർദ്ധിക്കാൻ ഇടയാകും. അങ്ങനെ കീറ്റോസിസ് എന്ന പ്രക്രിയയുടെ സംരക്ഷണത്തിന് വെളിച്ചെണ്ണ പ്രധാന പങ്കുവഹിക്കുന്നു. മുകളിൽ പറഞ്ഞ കാര്യങ്ങൾ എല്ലാം നിങ്ങൾ കൃത്യമായി ചെയ്യണം. ചീറ്റ് മീൽ എടുക്കുന്ന ദിവസം നിർബന്ധമായും ആപ്പിൾ സൈഡർ വിനാഗിർ (ACV ) കുടിച്ചിരിക്കണം. അധികമായി കഴിച്ച കാർബോഹൈഡ്രേറ്റിന്റെ ദഹനത്തെ ഇത് നിയന്ത്രിക്കുന്നു.

അമിത അന്നജം ഉള്ള ഭക്ഷണം കഴിക്കുമ്പോൾ മാത്രമല്ല ചീറ്റ് മീൽ ആകുന്നത്. പ്രോട്ടീന്റെ അളവ് കൂടുമ്പോഴും ചീറ്റ് മീൽ ആകും. അധിക അളവിലുള്ള പ്രോട്ടീനെ ലിവർ കാർബോഹൈഡ്രേറ്റ് ആയി മാറ്റുന്നു. നല്ല രീതിയിൽ മെറ്റബോളിക് സ്ട്രെങ്ത് ഉള്ള ആളുകൾ ആണെങ്കിൽ 36 മണിക്കൂർ വാട്ടർ ഫാസ്റ്റിംഗ് ചെയ്താൽ തന്നെ അവർ തിരിച്ചു കീറ്റോസിസിലെത്തും. ഇങ്ങനെ വാട്ടർ ഫാസ്റ്റിംഗ് എടുക്കുമ്പോൾ ഫാസ്റ്റിംഗ് സമയത്ത് യാതൊരു തരത്തിലുമുള്ള കാലറി ഡ്രിങ്കുകൾ കുടിക്കാൻ പാടുള്ളതല്ല. വാട്ടർ ഫാസ്റ്റിംഗ് ചെയ്യാൻ ബുദ്ധിമുട്ട് ഉള്ളവർക്ക് ലിക്വിഡ് ഫാസ്റ്റിംഗ് ചെയ്യാവുന്നതാണ്. ലിക്വിഡ് ഫാസ്റ്റിംഗിൽ 36 മണിക്കൂറിനുള്ളിൽ ഗ്രീൻ ടീ ,ബട്ടർ കോഫി, ബുള്ളറ്റ് പ്രൂഫ് കോഫി, ബ്ലാക്ക് കോഫി, ബ്ലാക്ക് ടീ, മധുരമില്ലാത്ത ബദാം മിൽക്ക് തുടങ്ങിയവ കുടിക്കാം. ഇങ്ങനെ ചെയ്താൽ വേഗം കീറ്റോസിസിൽ തിരിച്ചെത്താൻ സാധിക്കും . എങ്കിലും ചെയ്യുന്ന ആളുകളുടെ പ്രായം നമ്മൾ പരിഗണിക്കേണ്ടതാണ്. 30 വയസ്സിൽ താഴെയുള്ളവർക്ക് മെറ്റബോളിക് സ്ട്രെങ്ത് കൂടുതലായിരിക്കും. അതുകൊണ്ടുതന്നെ അവർ ഒരു ലിക്വിഡ് ഫാസ്റ്റിംഗോ അല്ലെങ്കിൽ വാട്ടർ ഫാസ്റ്റിംഗിനോ ശേഷം കീറ്റോസിസിൽ തിരിച്ചെത്തുന്നത് വേഗത്തിൽ ആയിരിക്കാം. യഥാർത്ഥത്തിൽ കീറ്റോ ഡയറ്റിൽ ചീറ്റ് മീൽ എന്നൊന്നില്ല. കീറ്റോജെനിക് ഡയറ്റിൽ കീറ്റോസിസ് എന്ന ആരോഗ്യകരമായ മെറ്റബോളിസം നഷ്ടപ്പെടും എന്നുള്ളതുകൊണ്ട് തന്നെ ഡയറ്റിൽ ഉൾപ്പെടാത്ത ഭക്ഷണങ്ങൾ കഴിക്കാതിരിക്കുക യാണ് വേണ്ടത്. കീറ്റോ കാൽക്കുലേറ്റർ ഉപയോഗിച്ചുകൊണ്ട് ഒരാളുടെ ശരീരത്തിൻറെ ഭാരത്തിനും ഉയരത്തിനും പ്രായത്തിനും അനുസൃതമായി മാക്രോ പ്രൊപോഷൻ (ഒരു ദിവസം കഴിക്കേണ്ട ഭക്ഷണങ്ങളുടെ അളവ്) ഗണിക്കേണ്ടതുണ്ട്. ആ അളവ് അനുസരിച്ച് കൃത്യമായി കാർബോഹൈഡ്രേറ്റും പ്രോട്ടീനും ഫാറ്റും കഴിക്കുമ്പോഴാണ് കീറ്റോജെനിക് എന്ന പ്രക്രിയയിലേക്ക് ശരീരം വേഗത്തിൽ എത്തുന്നത്. സ്വന്തമായി ഡയറ്റ് ചെയ്യുന്നവർക്ക് ഈ അളവ് കൃത്യമായി ലഭിക്കണമെന്നില്ല. പരിശീലനം ലഭിച്ച ഒരു പ്രൊഫഷണൽ ഗൈഡൻസ് ഇതിന് ആവശ്യമാണ്. കീറ്റോസിസിൽ തിരിച്ചെത്താൻ അവരുടെ മെറ്റബോളിസവും പ്രായവും എല്ലാം പരിഗണിക്കേണ്ടതുണ്ട്. കഴിച്ചുപോയ ചീറ്റ് മീലിന്റെ അളവ് നോക്കിയിട്ട് വേണം പരിഹാരമാർഗ്ഗങ്ങളിലേക്ക് കടക്കാൻ . ഒരു ചെറിയ കഷണം ചോക്ലേറ്റ് അല്ലെങ്കിൽ ലഡ്ഡു അങ്ങനെ എന്തെങ്കിലും കഴിച്ചാൽ പൂർണമായും കീറ്റോസിസ് എന്ന മെറ്റബോളിസത്തിൽനിന്ന് ഒഴിവാക്കപ്പെടണം എന്നില്ല. ഇവിടെയാണ് മെറ്റബോളിക് സ്ട്രെങ്ത്തിൻറെ ആവശ്യം. നല്ല രീതിയിൽ കൃത്യമായി ഡയറ്റ് പിന്തുടരുന്ന ഒരാൾ ഒരു ചെറിയ ചീറ്റ് മീൽ കൊണ്ട് ഉടനെതന്നെ ഡയറ്റിൽ നിന്ന് പുറത്താകണം എന്നില്ല. മെറ്റബോളിക് സ്ട്രെങ്ത് കുറവുള്ളവർ ചിലപ്പോൾ പുറത്തായേക്കാം. ഒരുപക്ഷേ കൂടുതൽ നാൾ ഡയറ്റ് പിന്തുടർന്നവർ എളുപ്പത്തിൽ പുറത്താകുകയും ഇല്ല . എന്തായാലും ചെറുതാണെങ്കിലും ചീറ്റ് മീൽ എന്നൊന്നു സംഭവിച്ചു കഴിഞ്ഞാൽ നമുക്ക് ഏറ്റവും അടുത്ത പ്രതിവിധി തൊട്ടടുത്ത നേരത്തെ ഭക്ഷണം ഉപേക്ഷിക്കുക എന്നതാണ്.

അടുത്തതായി അറിഞ്ഞോ അറിയാതെയോ ബിരിയാണി അല്ലെങ്കിൽ സദ്യ പോലെ ഉയർന്ന അളവിലുള്ള ചീറ്റിംഗ് എടുക്കുന്നവരെ കുറിച്ചുള്ളതാണ്. മറ്റൊരു അവസരം എന്നുപറയുന്നത് ഇടവിട്ടുള്ള ഉപവാസം അഥവാ ഇൻറർമിറ്റന്റ് ഫാസ്റ്റിംഗ് ആണ് . 16 മുതൽ 18 മണിക്കൂർ വരെയുള്ള ഫാസ്റ്റിംഗ് തുടർച്ചയായി ഒരു ആഴ്ച ചെയ്യണം. ഫാസ്റ്റിംഗ് സമയത്ത് വെള്ളം മാത്രം കുടിച്ചു കൊണ്ട് വേണം ഡയറ്റ് ചെയ്യാൻ . 20 മണിക്കൂർവരെ ഫാസ്റ്റിംഗ് ചെയ്യാവുന്നതാണ്. അത് ഓരോരുത്തരുടെയും കഴിവും മനഃസാന്നിധ്യവും അനുസരിച്ച് ചെയ്താൽ മതിയാകും. ഫാസ്റ്റിംഗ് സമയത്താണ് വ്യായാമം ചെയ്യേണ്ടത്. ഭക്ഷണം കഴിച്ചതിനുശേഷം എക്സർസൈസ് ചെയ്യരുത്. ഫാസ്റ്റിംഗ് അവസാനിപ്പിക്കുന്നതിന് കുറച്ചു മുൻപായി വ്യായാമം ചെയ്താൽ അത് കൂടുതൽ കലോറി എരിച്ചു കളയാൻ കാരണമാകും. ഇങ്ങനെ ചെയ്യുന്നത് കുടവയർ കുറയാൻ സഹായിക്കും.

ആപ്പിൾ സൈഡർ വിനാഗിരി (ACV) രണ്ട് ടീസ്പൂൺ, ഒരു നാരങ്ങയുടെ പകുതി, ആവശ്യത്തിന് ഹിമാലയൻ പിങ്ക് സാൾട് അഥവാ ഇന്തുപ്പ് , എന്നിവ ഒരു ഗ്ലാസ് വെള്ളത്തിൽ നന്നായി നേർപ്പിച്ചതിനുശേഷം ഒരു സ്ട്രോ ഉപയോഗിച്ച് ഉറങ്ങുന്നതിനു മുൻപ് കുടിക്കാവുന്നതാണ്. ആപ്പിൾ സൈഡർ വിനാഗിരി (ACV) എന്നത് ഒരു വീര്യം കുറഞ്ഞ ആസിഡ് ആണ് ,അത് പല്ലുകളിൽ സ്പർശിക്കുന്നത് നല്ലതല്ല. സ്ട്രോ ഉപയോഗിച്ച് കുടിക്കാൻ സാധിക്കാത്തവർക്ക് നേരിട്ട് കുടിക്കാവുന്നതാണ്. എന്നാൽ കുടിച്ചു കഴിഞ്ഞ ഉടനെ വായ നന്നായി കഴുകി വൃത്തിയാക്കണം അല്ലെങ്കിൽ ബ്രഷ് ചെയ്യണം. അധികം വരുന്ന കാർബോഹൈഡ്രേറ്റിനെ ദഹിപ്പിക്കാൻ ആപ്പിൾ സൈഡർ വിനാഗിരിക്കു കഴിയും. യൂറിക് ആസിഡ് അളവ് നിയന്ത്രിക്കാനും ഈ മിശ്രിതം സഹായിക്കും.

ഫാസ്റ്റിംഗ് സമയത്ത് പലരും ഉപ്പിട്ട നാരങ്ങാവെള്ളം, കട്ടൻ ചായ,കട്ടൻകാപ്പി, ഗ്രീൻ ടീ തുടങ്ങിയവ ഉൾപ്പെടുത്താറുണ്ട്. ഏറ്റവും പൂർണമായ ഒരു ഫലം ലഭിക്കാൻ ഫാസ്റ്റിംഗ് സമയത്ത് വെള്ളം മാത്രം കുടിക്കുക. വെള്ളം കുടിക്കുമ്പോൾ രണ്ടോ മൂന്നോ ലിറ്റർ കുടിച്ചാൽ മതിയാകും. ദാഹത്തിന് അനുസരിച്ചാണ് വെള്ളം കുടിക്കേണ്ടത്. ധാരാളം വെള്ളം കുടിക്കുന്നത് കൊണ്ട് ശരീരത്തിലെ അമിത കൊഴുപ്പ് ഉരുകി പോവുകയില്ല. വെള്ളം ഒരിക്കലും കൊഴുപ്പിനെ ദഹിപ്പിക്കുന്നില്ല. നമുക്ക് അറിയാവുന്നതുപോലെ വെള്ളത്തിൽ വെളിച്ചെണ്ണ ചേർത്താൽ അതൊരിക്കലും ലയിച്ചു യോജിക്കാറില്ല. വെളിച്ചെണ്ണ വേർതിരിഞ്ഞു തന്നെ നിൽക്കും.അതുപോലെതന്നെ വെള്ളം കുടിക്കുന്നത് കൊണ്ട് തടി കുറയാനോ കൊഴുപ്പ് ഉരുകാനോ സാധ്യതയില്ല. അത് തികച്ചും തെറ്റായ ഒരു പ്രചാരണമാണ്. വെള്ളം കുടിക്കുന്നത് ശരീരത്തിലെ മറ്റു പല ആവശ്യങ്ങൾക്കും ഉപാപചയപ്രവർത്തനങ്ങൾ കൃത്യമായി നടക്കുന്നതിനും വേണ്ടിയാണ്. അമിതമായ വെള്ളം നമ്മുടെ ശരീരത്തിന് ആവശ്യമില്ല. ശരീരത്തിൻറെ ഉയരത്തിനും ഭാരത്തിനും അനുസരിച്ച് മാത്രം വെള്ളം കുടിക്കുക. ഇന്റർമിറ്റന്റ് ഫാസ്റ്റിംഗ് എടുക്കുന്നവർ അഞ്ചോ ആറോ ലിറ്റർ വെള്ളം കുടിക്കുന്നത് ആയി പറയുന്നു. ഒരിക്കലും അതിൻറെ ആവശ്യമില്ല.

ചീറ്റ് മീൽ എടുത്തതിനുശേഷം ഒരാഴ്ച ഫാസ്റ്റിംഗ് എടുക്കുന്നവർ ഭക്ഷണത്തിൽ കൂടുതൽ കൊഴുപ്പ് ഉൾപ്പെടുത്താൻ ശ്രമിക്കണം. 5 വാൾനട്സ് 5 ബദാം, ബട്ടർ ഫ്രൂട് അതായത് അവോക്കാഡോ, Egg Yolk അഥവാ മുട്ടയുടെ മഞ്ഞക്കരു, 50 ഗ്രാം വെണ്ണ തുടങ്ങിയവ ഉൾപ്പെടുത്താം. പ്രോട്ടീൻ സ്രോതസിനു വേണ്ടി ഇറച്ചിയോ മീനോ ഉൾപ്പെടുത്തുമ്പോൾ deep oil ഫ്രൈ അഥവാ എണ്ണയിൽ മുക്കി പൊരിച്ചെടുക്കുന്ന രീതിയിൽ പാകം ചെയ്ത് എടുക്കേണ്ടതാണ്. സാലഡുകൾ കഴിക്കുമ്പോൾ നിർബന്ധമായും എക്സ്ട്രാ വിർജിൻ ഒലിവ് ഓയിൽ ചേർക്കുക. ബോൺ ബ്രോത് അഥവാ സൂപ്പുകൾ കുടിക്കാവുന്നതാണ്. ചീറ്റ് മീൽ എടുത്ത് കഴിഞ്ഞു തിരിച്ചു ഡയറ്റിലേക്ക് വരുമ്പോൾ ആദ്യത്തെ 7 ദിവസം വൈറ്റമിൻ ബി കോമ്പ്ലെക്സ് ഗുളിക കഴിക്കുന്നത് നല്ലതാണ്. സാധാരണ കീറ്റോജെനിക് ഡയറ്റിൽ 20 മുതൽ 50 ഗ്രാം വരെ കാർബോഹൈഡ്രേറ്റ് ആളുകൾ പൊതുവേ കഴിക്കാറുണ്ട്. എന്നാൽ ചീറ്റ് മീൽ എടുത്തതിനുശേഷം 5 ഗ്രാം മുതൽ 10 ഗ്രാമിനുള്ളിൽ കൃത്യമായി കാർബോഹൈഡ്രേറ്റിന്റെ അളവ് ശ്രദ്ധിക്കണം. ഈ 10 ഗ്രാമിൽ ഉൾപ്പെടുന്ന കാർബോ ഹൈഡ്രേറ്റ് ഇലക്കറികളിൽ നിന്ന് ലഭ്യമാക്കണം. ബാക്കി മത്സ്യമാംസ ഭക്ഷണങ്ങളിൽ നിന്നും മുട്ട വെളിച്ചെണ്ണ ബട്ടർ നെയ്യ് ഒലിവെണ്ണ തുടങ്ങിയവ ഉൾപ്പെടുത്താം. പച്ചക്കറികളിൽ നിന്ന് അല്ലാതെ കാർബോഹൈഡ്രേറ്റ് ഈ ഒരു കാലയളവിൽ ഉൾപ്പെടുത്താൻ പാടില്ല. കാർബോഹൈഡ്രേറ്റ് കൂടുതലുള്ള അണ്ടി വർഗ്ഗങ്ങളും ഒഴിവാക്കണം. ഇത്തരം കാര്യങ്ങൾ പറയുമ്പോഴും ചീറ്റ് മീൽ എന്നത് അവസാന അവസരം മാത്രമായിരിക്കണം.

അടുത്തതായി സുഖകരമായ ഉറക്കം അത്യാവശ്യമാണ്. എട്ടു മണിക്കൂറെങ്കിലും ഒരുദിവസം ഉറങ്ങാൻ ശ്രമിക്കണം. ഉറങ്ങുന്നത് വഴി സ്ട്രെസ് അഥവാ മാനസിക പിരിമുറുക്കം കുറയുകയും അങ്ങനെ കോർട്ടിസോളിന്റെ അളവ് കുറയുകയും ചെയ്യുന്നു. അതുമൂലം മെറ്റബോളിസം വർദ്ധിക്കുകയും പെട്ടെന്ന് കീറ്റോസിസിൽ എത്താൻ സഹായിക്കുകയും ചെയ്യുന്നു. മുകളിൽ പറഞ്ഞ കാര്യങ്ങളെല്ലാം ചീറ്റ് മീൽ എടുത്തവർക്കും ശരീരഭാരം കുറയുന്നത് സ്റ്റക്ക് ആയവർക്കും പിന്തുടരാവുന്ന കാര്യങ്ങളാണ്. ഡയറ്റ് എടുക്കുന്ന എല്ലാവർക്കും ഈ കാര്യങ്ങൾ പിന്തുടരാവുന്നതാണ്.

Keto diet cheat meal remedies

Keto diet cheat meal remedies

Keto Diet Cheat meal remedies: Tips and tricks to reach ketosis

കീറ്റോ ഡയറ്റ് തെറ്റിച്ചാൽ (CHEAT MEAL) വളരെ വേഗത്തിൽ കീറ്റോസിസിൽ എത്താൻ എന്താണ് പരിഹാരം

ചീറ്റ് മീൽ എന്നാൽ കീറ്റോ ഡയറ്റിൽ ഉൾപ്പെടാത്ത അമിത അളവിൽ അന്നജം അടങ്ങിയ ഭക്ഷണങ്ങൾ കഴിക്കുന്നതാണ്. ഇത്തരത്തിലുള്ള ഭക്ഷണം കഴിച്ചാൽ നമ്മൾ ഡയറ്റിൽ നിന്നും പുറത്താകും. ഡയറ്റിൽ നിന്ന് നമ്മൾ പുറത്തായാൽ എങ്ങനെയാണ് തിരിച്ചു വരേണ്ടത്. ഒന്നാമതായി ചെറിയ രീതിയിലുള്ള ഭക്ഷണങ്ങൾ അതായത് ഒരു ലഡ്ഡു അല്ലെങ്കിൽ ഒരു ചെറിയ കഷണം കേക്ക് എന്നിങ്ങനെയുള്ള ലഘുവായ അളവിൽ ചീറ്റ് മീലുകൾ എടുക്കുന്നവർ അടുത്ത നേരത്തെ ഭക്ഷണം ഒഴിവാക്കണം. അതായത് skip next meal. വിശദമായി പറഞ്ഞാൽ ഇന്ന് ഉച്ചയ്ക്ക് നിങ്ങൾ ഒരു കഷണം കേക്ക് കഴിച്ചു എങ്കിൽ രാത്രിയിലെ ഭക്ഷണം ഒഴിവാക്കുക.

എന്നാൽ ചില ആളുകൾ കൂടിയ അളവിലുള്ള ചീറ്റ് മീൽ അതായത് ബിരിയാണി , എന്തെങ്കിലും സദ്യകൾ എന്നിവ കഴിച്ചതിനുശേഷം എങ്ങനെയാണ് ഡയറ്റിലേക്ക് തിരിച്ചു വരേണ്ടത് എന്ന് ചോദിക്കാറുണ്ട്. അത്തരക്കാർക്ക് ഒരു നേരത്തെ ഭക്ഷണം ഒഴിവാക്കിയാൽ മതിയാകില്ല. അവർ ഏഴു ദിവസം തുടർച്ചയായി 18 മണിക്കൂർ നേരത്തെ ഉപവാസം എടുക്കേണ്ടതാണ്. ഇൻറർമിറ്റൻഡ് ഫാസ്റ്റിംഗിന്റെ പാറ്റേൺ മാത്രമല്ല ഈ സമയത്ത് ഡയറ്റിൽ ഉൾപ്പെടുത്തേണ്ട ഭക്ഷണങ്ങളും പ്രാധാന്യമർഹിക്കുന്നു. 5 വാൾനട്ട് 5 ബദാം എന്നിവ ഉൾപ്പെടുത്താം. ഒരു ബട്ടർഫ്രൂട്ടിൻറെ പകുതി കഴിക്കാം. നാല് കോഴിമുട്ടയുടെ മഞ്ഞക്കരു കഴിക്കാം. പുറത്തുള്ള വെളുത്ത ഭാഗം ഒഴിവാക്കാവുന്നതാണ്. ഡയറ്റിലേക്ക് തിരിച്ചു വരാൻ കൂടുതൽ കൊഴുപ്പ് കഴിക്കേണ്ടത് അനിവാര്യം ആയതുകൊണ്ടാണ് ഇത്. ബട്ടർ ഒരു ദിവസം 50 ഗ്രാം ഉപയോഗിക്കാം.

പ്രോട്ടീൻറെ ലഭ്യതയ്ക്ക് വേണ്ടി ചിക്കനോ മീനോ ഭക്ഷണത്തിൽ ഉൾപ്പെടുത്തുമ്പോൾ വെളിച്ചെണ്ണയിൽ നന്നായി മുക്കി പൊരിച്ച് എടുക്കേണ്ടതാണ്. 200 ഗ്രാമിൽ താഴെ വരുന്ന രീതിയിൽ വെജിറ്റബിൾ സാലഡുകൾ ഉപയോഗിക്കാം. അതിൽ ഒരു ടേബിൾ സ്പൂൺ എക്സ്ട്രാ വിർജിൻ ഒലിവ് ഓയിൽ ഉപയോഗിക്കുക. ചീറ്റ് മീലുകൾ എടുക്കുന്ന ദിവസങ്ങളിൽ ആപ്പിൾ സൈഡർ വിനാഗിരി നിർബന്ധമായും ഉപയോഗിക്കുക. ഒരു ഗ്ലാസ് നാരങ്ങാവെള്ളത്തിൽ രണ്ടു ടീസ്പൂൺ ചേർത്ത് കുടിക്കാവുന്നതാണ്. അതുപോലെ ബോൺ ബ്രോത്ത് ഈ സമയത്ത് കുടിക്കാവുന്നതാണ്. ചീറ്റ് മീൽ എടുത്ത അന്നുമുതൽ അടുത്ത ഏഴു ദിവസത്തേക്ക് ഒരു ദിവസം 40 മിനിറ്റ് വീതം നിർബന്ധമായും എക്സർസൈസ് ചെയ്യേണ്ടതാണ്. അതേപോലെ ഏഴു ദിവസത്തേക്ക് വൈറ്റമിൻ ബി കോംപ്ലക്സിന്റെ ഗുളിക ഭക്ഷണശേഷം ഓരോന്ന് വീതം ദിവസവും കഴിക്കുക. ഈ രീതിയിൽ മുന്നോട്ടു പോകുന്ന 80 ശതമാനം ആളുകളും കീറ്റോസിസിൽ വളരെവേഗം എത്താറുണ്ട്. എല്ലാവരും ഒരേ പോലെ തന്നെ കീറ്റോസിസിലേക്ക് തിരിച്ചു പ്രവേശിക്കണം എന്നില്ല. ചില ആളുകൾ രണ്ട് മണിക്കൂർ കൊണ്ടും ചില ആളുകൾ രണ്ട് ദിവസം കൊണ്ടും ചിലർ രണ്ട് ആഴ്ചകൾ കൊണ്ടുമാണ് കീറ്റോസിസിലേക്ക് തിരിച്ചു വരിക. നമ്മുടെ മെറ്റബോളിക് സ്ട്രെങ്ത്തിനെ ആശ്രയിച്ചായിരിക്കും ഈ പ്രക്രിയ ദ്രുതഗതിയിൽ ആകുന്നത്. മെറ്റബോളിക് സ്ട്രെങ്ങ്ത്ത് വർദ്ധിപ്പിക്കുവാൻ വേണ്ടി ഉള്ള ടിപ്സുകൾ ആണ് ഇപ്പോൾ മുകളിൽ പറഞ്ഞത്. വ്യായാമം, എട്ടുമണിക്കൂർ ഉറക്കം, ഇടവിട്ടുള്ള ഉപവാസം, എന്നിവ. കൊഴുപ്പ് കൂടുതലുള്ള ഭക്ഷണങ്ങൾ ഉൾപ്പെടുത്താനായി ശ്രദ്ധിക്കുക. ഈ കാലയളവിൽ കൂടിയ അളവിൽ പ്രോട്ടീനോ കൂടിയ അളവിൽ അന്നജമോ ഉൾപ്പെടുത്താതെയിരിക്കുക. ഇതൊക്കെയാണെങ്കിലും നിങ്ങൾ ദയവുചെയ്ത് ചീറ്റ് മീലുകൾ എടുക്കാതിരിക്കുക. നമ്മുടെ കുറച്ചു ദിവസത്തെ കഠിനാധ്വാനവും കഠിനപ്രയത്നവും ആണ് ഒരു ദിവസത്തെ ഒരു നേരത്തെ ഭക്ഷണം കൊണ്ട് ഇല്ലാതെയാകുന്നത് എന്ന് നിങ്ങൾ ഓർക്കണം.

Keto Diet Side effects in Malayalam

Keto Diet Side effects in Malayalam

LCHF Keto Diet Side effects: Truth behind the death of Bengali actress

മിസ്തി മുഖർജി എന്ന ബംഗാളി നടിയുടെ മരണത്തിന് പിന്നിലെ സത്യം എന്താണ്

കീറ്റോ ഡയറ്റ് ചെയ്തു ഇതുവരെ ആരും വൃക്ക തകരാറിലായി മരണപ്പെട്ടിട്ടില്ല. ലക്ഷക്കണക്കിന് ആളുകൾ പിന്തുടരുന്ന ഒരു ഡയറ്റാണ് കീറ്റോ ഡയറ്റ്. എന്താണ് യഥാർത്ഥത്തിൽ സംഭവിച്ചത് എന്ന് അറിയേണ്ടത് എല്ലാവരുടെയും കടമയാണ്. കീറ്റോ ഡയറ്റ് എന്നുപറയുന്നത് ഉയർന്ന അളവിലുള്ള കൊഴുപ്പും മിതമായ അളവിൽ മാംസ്യവും കുറഞ്ഞ അളവിലുള്ള അന്നജവും ചേർന്നുള്ള ഒരു ഭക്ഷണ രീതി ആണ് . എന്നാൽ മാധ്യമങ്ങളിലെല്ലാം ഈ നടിയുടെ മരണവുമായി ബന്ധപ്പെട്ട് പറഞ്ഞതനുസരിച്ചു ഇവർ അമിതമായ പ്രോട്ടീൻ അടങ്ങിയ ഭക്ഷണമാണ് ഡയറ്റിൽ ഉൾപ്പെടുത്തിയിരുന്നത്. അതൊരിക്കലും കീറ്റോ ഡയറ്റ് ആകുന്നില്ല. കീറ്റോ ഡയറ്റിൽ 20% ശരീരഭാരത്തിന് അനുസൃതമായ പ്രോട്ടീൻ മാത്രമാണ് നിർദ്ദേശിക്കപ്പെടുന്നത്. എന്നാൽ ശരീര ഭാരം യഥേഷ്ടം കൂട്ടുകയും കുറയ്ക്കുകയും ചെയ്യുന്നതിനുവേണ്ടി സ്റ്റിറോയ്ഡ് പോലെയുള്ള ഡ്രഗ്സ്സ് ഉപയോഗിക്കുമ്പോൾ വൃക്ക തകരാറിലാകാൻ സാധ്യതയുണ്ട്. ഇത്ര ചെറുപ്പത്തിൽതന്നെ ഇവർക്ക് വൃക്ക തകരാറിലായെങ്കിൽ അതിനു മറ്റു പല കാരണങ്ങളും ഉണ്ടാകാം. നമുക്ക് അറിയാവുന്നതുപോലെ നാല്പതും അമ്പതും അറുപതും വയസ്സുള്ളവർ കീറ്റോ ഡയറ്റ് വളരെ ആരോഗ്യകരമായ രീതിയിൽ ചെയ്യുന്നുണ്ട്. അത്രയും പ്രായമായ ആളുകൾ ഈ ഡയറ്റ് ചെയ്തിട്ടും യാതൊരു ആരോഗ്യ പ്രശ്നങ്ങളും ഉണ്ടാകാതിരിക്കെ ഈ നടിക്ക് ഇങ്ങനെ സംഭവിച്ചു എങ്കിൽ അതിനു പിന്നിൽ എന്തെങ്കിലും മറ്റു കാരണങ്ങൾ ഉണ്ടായിരിക്കാം. നമ്മുടെ ശരീരത്തിലേക്ക് അമിതമായ വിഷാംശങ്ങൾ പ്രവേശിക്കുക യാണെങ്കിൽ വൃക്കയ്ക്കും കരളിനും ആണ് അമിതമായ ജോലി ഉണ്ടാകുന്നത്. കിഡ്നി ഫംഗ്ഷൻ ടെസ്റ്റ് ചെയ്യാതെ ഇവർ ഡയറ്റ് ചെയ്യാനുള്ള സാധ്യത വളരെ കുറവാണ്.

Studies prove that ketogenic diet will help to reverse kidney diseases

എന്തെങ്കിലും ഒരു കാരണത്തെ മറയ്ക്കാൻ ആകാം ഈ മരണം കീറ്റോ ഡയറ്റ് മൂലമാണെന്ന് അവരുടെ ബന്ധുക്കൾ ആരോപിച്ചത്. ഈ ഡയറ്റിനെ മാത്രം വിശ്വസിച്ചു കൊണ്ട് ഒരുപാട് ജനങ്ങൾ ഇത് പിന്തുടരുന്നുണ്ട്. ഇത്തരത്തിലുള്ള അനാവശ്യമായ വിവാദങ്ങളിലൂടെ ആരും ജനങ്ങളെ നിരാശപ്പെടുത്തരുത് എന്നാണ് ഞങ്ങളുടെ പക്ഷം. അംബാനിയുടെ മകൻ അനന്ദ് അംബാനി എന്ന ഒരു യുവാവ് തൻറെ അമിത ഭാരം കുറച്ചത് കീറ്റോ ഡയറ്റ് പിന്തുടർന്നു കൊണ്ടാണ്. ഡോക്ടർമാർ എല്ലാവരും സർജറിക്കു നിർദ്ദേശിച്ചു എങ്കിലും അനന്ദ് സർജറി ചെയ്യാതെ കീറ്റോ ഡയറ്റ് പിന്തുടരുകയാണ് ചെയ്തത്.  ഡയറ്റിനോടൊപ്പം  ധാരാളം വ്യായാമങ്ങളും പിന്തുടർന്നുകൊണ്ട് ശരീരത്തെ അമിത ഭാരത്തിൽ നിന്നും മനോഹരമായ രൂപഭംഗി യിലേക്ക് അയാൾ കൊണ്ടുവന്നു. പല മാധ്യമങ്ങളും ഇത് പ്രസിദ്ധപ്പെടുത്തിയിട്ടുള്ള തുമാണ്. അങ്ങനെയെങ്കിൽ മരണമടഞ്ഞ സ്ത്രീക്ക് കീറ്റോ ഡയറ്റിനു മുൻപ് തന്നെ കാര്യമായ വൃക്കത്തകരാറുകൾ എന്തെങ്കിലും ഉണ്ടായിരുന്നിരിക്കണം. തുടർച്ചയായ മരുന്നുകളുടെ ഉപയോഗം തന്നെ വൃക്ക തകരാറിലാകാൻ കാരണമാകുന്നുണ്ട്.  ഏതൊരു സിനിമാ താരത്തിനും സ്വന്തമായി ഒരു ഡയറ്റീഷ്യൻ ഉണ്ടായിരിക്കും. അത്തരത്തിൽ ഒരു ഡയറ്റീഷ്യനെകുറിച്ച് ഈ വാർത്ത മാധ്യമങ്ങളിൽ ഒന്നും തന്നെ പറഞ്ഞിട്ടുമില്ല. കീറ്റോ ഡയറ്റ് ചെയ്തത് കൊണ്ടല്ല  ഇവർക്ക് വൃക്ക തകരാറിലായത് എന്നത് 100% സത്യമാണ്. കാരണം ഞങ്ങളുടെ ഇത്രയും വർഷത്തെ വ്യക്തിപരമായുള്ള പരിചയത്തിലും അനുഭവത്തിലും നിന്നാണ് ഞങ്ങൾ ഇത് പറയുന്നത്. കീറ്റോ ഡയറ്റിൽ അഞ്ച് ശതമാനം മാത്രമാണ് അന്നജം കഴിക്കുന്നത്. അതുകൊണ്ടുതന്നെ ധാരാളം ആളുകൾ തെറ്റിദ്ധരിച്ചു വച്ചിട്ടുള്ളത് അമിതമായ മത്സ്യ-മാംസാഹാരങ്ങൾ കഴിക്കുന്ന ഒരു ഡയറ്റ് ആണ് ഇത് എന്നാണ്. എന്നാൽ കൃത്യമായി തന്നെ ഓരോ ഭക്ഷണങ്ങൾക്കും പ്രത്യേകം അളവുകളും കണക്കുകളും ഉണ്ട് എന്ന് പലരും മറന്നുപോകുന്നു.

ഇലക്കറികൾ നിർബന്ധമായും ഭക്ഷണത്തിൽ ഉൾപ്പെടുത്തണം എന്ന് ഇതിൽ നിർദ്ദേശിക്കപ്പെടുന്നു. ഫൈബർ അടങ്ങിയ ഭക്ഷണങ്ങൾ ഉൾപ്പെടുത്തുന്നില്ലെങ്കിൽ മലബന്ധം വരാനുള്ള സാധ്യതകൾ വളരെയേറെയാണ്. ഇലക്കറികൾ ധാരാളം കഴിക്കുമ്പോൾ കാർബോഹൈഡ്രേറ്റിന്റെ അളവ് കൂടുമെന്നാണ് പലരും തെറ്റിദ്ധരിച്ചിട്ടുള്ളത്. എന്നാൽ അതിന്റെയെല്ലാം നെറ്റ് കാർബ് നോക്കുമ്പോൾ നമ്മൾ പറഞ്ഞ അളവിലുള്ള 5 ശതമാനത്തിലേക്ക് കാർബോഹൈഡ്രേറ്റിനെ കൊണ്ടുവരാൻ സാധിക്കുന്നതാണ്. കീറ്റോ ഡയറ്റ് വളരെ സുരക്ഷിതമാണ്, ആർക്കുവേണമെങ്കിലും എപ്പോൾ വേണമെങ്കിലും സ്വന്തം ഇഷ്ടപ്രകാരം ചെയ്യാവുന്ന ഒന്നാണ് എന്ന അഭിപ്രായം തീർത്തും തെറ്റാണ്. ഡയറിനെകുറിച്ച് നന്നായി പഠിക്കുകയും അതിൻറെ ഗുണങ്ങൾ എന്തൊക്കെയാണ് ദോഷവശങ്ങൾ എന്തൊക്കെയാണ് എന്ന് നന്നായി മനസ്സിലാക്കിയിരിക്കേണ്ടതാണ്. കാർബോഹൈഡ്രേറ്റിന്റെ അളവ് ഗണ്യമായി കുറയ്ക്കുകയും കൊഴുപ്പിന്റെ അളവ്  കൂട്ടുകയും ചെയ്തു കൊണ്ട് ഡയറ്റ് എടുക്കുമ്പോൾ നമ്മുടെ ശരീരം കീറ്റോസിസ് എന്ന പ്രക്രിയയിലേക്ക് മാറുന്നു. ആദ്യത്തെ മൂന്ന് നാല് ദിവസങ്ങളിൽ ഇതോടനുബന്ധിച്ചുള്ള ശാരീരിക അസ്വസ്ഥതകൾ സ്വാഭാവികമാണ്. അങ്ങനെയുള്ള അസ്വസ്ഥതകൾ ഉണ്ടാകുമ്പോൾ ചിലർ ചീറ്റ് മീലുകൾ എടുക്കാറുണ്ട്.

എന്തെങ്കിലും മധുര പദാർത്ഥങ്ങളോ അന്നജം കൂടുതൽ അടങ്ങിയിട്ടുള്ള ഭക്ഷണങ്ങളോ അവർ കഴിക്കുകയും കീറ്റോസിസ് എന്ന പ്രക്രിയയിൽ നിന്ന് പൂർണ്ണമായും പുറത്തുവരുകയും ചെയ്യുന്നു. അത് അറിയാതെ അവർ തുടർന്നു വീണ്ടും ഉയർന്ന കൊഴുപ്പടങ്ങിയ ഭക്ഷണങ്ങൾ കഴിക്കുമ്പോൾ കൂടുതൽ സങ്കീർണ്ണമായ പ്രശ്നങ്ങൾ ഉണ്ടാകാനുള്ള സാധ്യതകൾ വളരെയധികമാണ്. കാർബോഹൈഡ്രേറ്റ് മെറ്റബോളിസത്തിൽ നിന്ന് ഫാറ്റ് മെറ്റബോളിസത്തിലേക്ക് വരാൻ കുറച്ചു കാലത്തെ അധ്വാനവും ഭക്ഷണനിയന്ത്രണവും അനിവാര്യമാണ്. എന്നാൽ കീറ്റോസിസ് എന്ന പ്രക്രിയയിൽ നിന്ന് ശരീരം പുറത്തു പോകാൻ വളരെ എളുപ്പമാണ്. പലരും ഇത്തരം കാര്യങ്ങൾ അറിയാതെയാണ് ഈ ഡയറ്റ് ചെയ്യുന്നത്. എല്ലാ ഭക്ഷണരീതികളും എല്ലാവർക്കും ഒരുപോലെ അല്ല എന്നും എല്ലാവരുടെയും ശാരീരിക നിലയും ആരോഗ്യസ്ഥിതിയും തുല്യമല്ല എന്നും ഡയറ്റ് ചെയ്യുന്നവർ മനസ്സിലാക്കണം. ചെറുപ്പക്കാർ  ഡയറ്റിനിടയിൽ ചീറ്റ് മീൽ എടുത്താലും കീറ്റോസിസിലേക്ക് തിരിച്ചു വരുക ഒരുപക്ഷേ എളുപ്പമായിരിക്കും.  എന്നാൽ പ്രായമായവർക്ക് അങ്ങനെ ആയിരിക്കുകയില്ല. അതുകൊണ്ടുതന്നെ കീറ്റോ ഡയറ്റ് പിന്തുടരുന്നവർക്ക്  ഒരു എക്സ്പേർട്ട് പാനലിന്റെ സഹായം അനിവാര്യമാണ്. അതല്ലാത്ത പക്ഷം ഈ ഡയറ്റിനെ കുറിച്ച് വ്യക്തമായി കുറച്ചുനാൾ പഠിച്ചതിനു ശേഷം മാത്രം ഡയറ്റിലേക്ക് വരിക. കീറ്റോ ഡയറ്റ് എന്ന പേരിൽ പലരും തെറ്റായ ഭക്ഷണ രീതികൾ പിന്തുടരുന്നുണ്ട്. ഒരു കാരണവശാലും ഉയർന്ന അന്നജം അടങ്ങിയ ഭക്ഷണങ്ങൾ ഈ ഡയറ്റിൽ ഉൾപ്പെടുത്താൻ പാടുള്ളതല്ല എന്ന വസ്തുത എല്ലാവരും മനസ്സിലാക്കണം. അമിതമായ കാർബോഹൈഡ്രേറ്റ് അടങ്ങിയ ഭക്ഷണങ്ങൾ കഴിക്കുന്നത് മൂലം ജീവിതശൈലി രോഗങ്ങളുടെ പിടിയിൽ അമർന്ന ജനങ്ങൾ കീറ്റോ ഡയറ്റ് പിന്തുടരുന്നത് സ്വാഭാവികം. ജീവിതശൈലി രോഗങ്ങൾ മൂലം ആളുകൾ മരിക്കുന്ന വാർത്തകൾക്ക് പ്രാധാന്യം നഷ്ടപ്പെട്ടുകൊണ്ടിരിക്കുന്ന ഈ കാലഘട്ടത്തിൽ ഒരു ഡയറ്റ് എടുത്തതു മൂലം ഒരു ആൾ മരിച്ചു എന്ന വാർത്ത ഇത്രയേറെ പ്രചരിച്ചതിന് പിന്നിലെ യാഥാസ്ഥിതികത എല്ലാവരും ചിന്തിക്കണം. ഏതാനും ചില യൂട്യൂബ് വീഡിയോകൾ മാത്രം കണ്ടുകൊണ്ട് ആരംഭിക്കേണ്ടതല്ല കീറ്റോ ഡയറ്റ്. നിർഭാഗ്യമെന്നു പറയട്ടെ ഒരുപാട് യൂട്യൂബേർസ് കീറ്റോ ഡയറ്റ് എന്ന പേരിൽ തെറ്റായ പലകാര്യങ്ങളും പ്രചരിപ്പിക്കുന്നുണ്ട്. ഇത്തരത്തിൽ വീഡിയോ ചെയ്യുന്നവർ ഏത് മെഡിക്കൽ കോഴ്സിന്റെ അടിസ്ഥാനത്തിലാണ് അല്ലെങ്കിൽ ഏത് വിദ്യാഭ്യാസത്തിൻറെ അടിസ്ഥാനത്തിലാണ് ഇതുപോലെയുള്ള കാര്യങ്ങൾ പ്രചരിപ്പിക്കുന്നത് എന്ന് നിങ്ങൾ നോക്കണം.

ഒരു മെഡിക്കൽ പ്രൊഫഷണലിസ്റ്റിന്റെ സഹായത്തോടെ അല്ലാതെ നിങ്ങൾ ഇത്തരം കാര്യങ്ങൾക്ക് ചാടി പുറപ്പെടരുത്. ചോറും ചപ്പാത്തിയും പോലും ഒഴിവാക്കാൻ സാധിക്കാത്ത നിരവധി ആളുകൾ നമുക്ക് ചുറ്റുമുണ്ട്. അങ്ങനെയുള്ളവരെ സംബന്ധിച്ചിടത്തോളം കീറ്റോ ഡയറ്റ് വളരെ കഷ്ടപ്പാടുകൾ നിറഞ്ഞതായിരിക്കും. എന്നാൽ നമ്മുടെ പൂർവ്വീകർ ഇത്തരത്തിലുള്ള ഭക്ഷണ രീതിയാണ് പിന്തുടർന്നിരുന്നത് എന്ന് നമ്മൾ ഓർക്കണം. വേട്ടയാടി പിടിക്കുന്ന നായാട്ടിറച്ചി ആയിരുന്നു അവർ ഭക്ഷിച്ചിരുന്നത്. എന്നാൽ നമ്മുടെ പൂർവികരിൽ ആരുംതന്നെ വൃക്ക തകരാറിലായി മരിച്ചിട്ടില്ല. അരിയും ഗോതമ്പും കൃഷി ചെയ്തു ഭക്ഷണം ഉണ്ടാക്കി കഴിച്ചിരുന്ന ഒരു കാലഘട്ടം അവരുടെ ജീവിതത്തിൽ ഉണ്ടായിട്ടില്ല. അവരാകട്ടെ പൂർണ ആരോഗ്യവാൻമാരും ആയിരുന്നു. പ്രോട്ടീൻ കൂടുതൽ അടങ്ങിയ ഭക്ഷണം കഴിച്ചവരുടെ വൃക്ക തകരാറിലാകുമെന്ന് പറയുന്നതും പൂർണ്ണമായും ശരിയല്ല. ബോഡി ബിൽഡിങ്ങിന് വേണ്ടി ജിംനേഷ്യത്തിലേക്ക് പോകുന്നവർ മസ്കുലർ ബോഡി രൂപപ്പെടുത്തിയെടുക്കാൻ വേണ്ടി പ്രോട്ടീൻ പൗഡർ പോലെയുള്ള ഭക്ഷണങ്ങൾ കഴിക്കുന്നുണ്ട്. ഇപ്പോൾ പുറത്തു വന്ന ഈ വാർത്ത സത്യമാണെങ്കിൽ ജിംനേഷ്യത്തിൽ പോകുന്ന അനേകം യുവാക്കമാർ വൃക്ക തകരാറിലായി മരിക്കേണ്ട സമയം കഴിഞ്ഞു. എന്നാൽ അവിടെയും അവർക്ക് കൃത്യമായ കാര്യങ്ങൾ നിർദ്ദേശിച്ചു കൊടുക്കുന്ന ഒരു ട്രെയിനർ ഉണ്ടായിരിക്കും. ഒരു ന്യൂട്രീഷനിസ്റ്റ് ഉണ്ടായിരിക്കും.

നമ്മുടെ ശരീരത്തിൽ ഇൻസുലിൻ എന്ന ഹോർമോണിൻറെ അളവ് കൂടുമ്പോൾ ഹൃദയസംബന്ധമായതോ  തലച്ചോറ് സംബന്ധമായതോ അല്ലെങ്കിൽ മറ്റു പല രോഗങ്ങൾക്കും കാരണമായേക്കാം. അതുകൊണ്ട്  അമിതമായ അന്നജങ്ങൾ അടങ്ങിയ ഭക്ഷണം കുറയ്ക്കുമ്പോൾ ഇൻസുലിന്റെ അളവ് കുറയുകയും അതു മൂലമുണ്ടാകുന്ന ശാരീരിക പ്രശ്നങ്ങളെ ഒരു പരിധിവരെ തടയാൻ കഴിയും എന്നുമാണ് ഇപ്പോൾ പഠനങ്ങൾ തെളിയിക്കുന്നത്.  നിരന്തര ഗവേഷണത്തിലൂടെ തെളിയിക്കപ്പെട്ടിട്ടുള്ള ഇത്തരം കാര്യങ്ങളെ അവഗണിച്ചുകൊണ്ടാണ് ഇന്ന് മാധ്യമങ്ങൾ കീറ്റോ ഡയറ്റിനെ നിശിതമായി വിമർശിക്കുന്നത്. കീറ്റോ ഡയറ്റ് ചെയ്തു അമിതവണ്ണം കുറച്ചവരിൽ പ്രശസ്തരും പ്രഗത്ഭരുമായ പല ആളുകളും ഇന്ന് ഉണ്ട്. സിനിമ ഇൻഡസ്ട്രിയിൽ   ഒരു നിശ്ചിത കാലഘട്ടത്തിലേക്ക് ശരീര ഭാരം കൂട്ടുകയും കുറയ്ക്കുകയും ചെയ്യുന്ന ഒരു ഹെൽത്തി ഡയറ്റ്  ആണ് ഇന്ന് കീറ്റോ ഡയറ്റ്. സിനിമാ മേഖലയിൽ നമുക്ക് അറിയാവുന്നതുപോലെ നടീനടൻമാർ ഇഷ്ടാനുസൃതം തടി കൂട്ടുകയും കുറയ്ക്കുകയും ചെയ്യുന്നുണ്ട്. നമ്മുടെ ശരീരം ഒരിക്കലും ഒരു യന്ത്രം അല്ല. ശരീരത്തിലെ ഉപാപചയ പ്രവർത്തനങ്ങൾക്ക് ദോഷം വരുന്ന രീതിയിൽ നമ്മൾ ഒരു ഡയറ്റും പിന്തുടരാൻ പാടില്ല. ഓരോ ഡയറ്റും എത്ര കാലത്തേക്ക് ചെയ്യണമെന്ന് അവരുടെ ശരീരത്തിനനുസൃതം അവരുടെ ന്യൂട്രീഷനിസ്റ്റുകൾ നിർദ്ദേശിക്കും.

എന്തായാലും കീറ്റോ ഡയറ്റ് ചെയ്തത് മൂലമല്ല ഈ നടി മരിച്ചത് എന്ന് നൂറു ശതമാനം ഉറപ്പാണ്. ഒന്നുകിൽ ഡയറ്റിന് മുൻപ് അവരുടെ വൃക്ക തകരാറിലായിരിക്കാം. അത് മാറാൻ വേണ്ടി അവർ ഡയറ്റ് പിന്തുടർന്നിരുന്നോ എന്ന് നമുക്കറിയില്ല. അവരുടെ ബന്ധുക്കളിൽ ആരെങ്കിലും കീറ്റോ ഡയറ്റ് എന്ന പേര് പറഞ്ഞത് മൂലം ഈ പ്രശ്നം മുഴുവൻ കീറ്റോ ഡയറ്റ് എന്ന പേരിൽ അറിയപ്പെടാൻ ഇടയായതായിരിക്കാം. എന്തായാലും മരിച്ചുപോയ ആ സ്ത്രീയ്ക്ക്  ആത്മശാന്തി നേരുന്നു. അവരുടെ കുടുംബാംഗങ്ങളുടെ ദുഃഖത്തിൽ ഞങ്ങളും പങ്കുചേരുന്നു.

വാർത്ത മാധ്യമങ്ങളോട് ഞങ്ങൾക്ക് പറയാനുള്ളത് ഇത്രമാത്രം. ഒരു കാര്യം പ്രസ്താവിക്കുമ്പോൾ അത് ശരിയാണോ തെറ്റാണോ എന്ന് ഉറപ്പുവരുത്തുക. കാരണം ഈ ഡയറ്റ് പിന്തുടരുന്ന ലക്ഷക്കണക്കിനാളുകൾ ഇതുമൂലം തെറ്റിദ്ധരിക്കപ്പെടാൻ ഇടയായിട്ടുണ്ട്. കീറ്റോ ഡയറ്റിനെ എതിർക്കുന്ന  എല്ലാവരും ഈ വാർത്തയ്ക്ക് വലിയ പ്രാധാന്യം നൽകിവരുന്നു.   ഈ ഡയറ്റ് ചെയ്യുന്ന എല്ലാവർക്കും അറിയാവുന്നതാണ് അവരവരുടെ കുടുംബാംഗങ്ങളിൽ നിന്നും ആണ് അവർ കൂടുതൽ എതിർപ്പ് നേരിട്ടിട്ടുള്ളത്. അതുതന്നെയാണ് ഈ നടിയുടെ കാര്യത്തിലും സംഭവിച്ചത്. കീറ്റോ ഡയറ്റ് ചെയ്യുന്ന എല്ലാവരും അതുമൂലമുണ്ടായ നേട്ടങ്ങളും ആരോഗ്യ പുരോഗതിയും അനുഭവിച്ചറിഞ്ഞവരാണ്. എല്ലാവർക്കും ആരോഗ്യമുള്ള ഒരു ജീവിതം നേരുന്നു. നല്ല ഭക്ഷണരീതിയാണ് ആരോഗ്യമുള്ള ജീവിതം പ്രദാനം ചെയ്യുന്നത്. ഭക്ഷണമാണ് മരുന്ന്. നന്ദി

How to control hair loss in Keto Diet

How to control hair loss in Keto Diet

Hair loss in LCHF-Keto diet: causes and tips to hair growth

കീറ്റോ ഡയറ്റിൽ മുടികൊഴിച്ചിൽ ഉണ്ടാകുമോ

തുടർച്ചയായി മുടി കൊഴിയുന്നത് എല്ലാവർക്കും മാനസികമായി വിഷമം ഉണ്ടാക്കുന്ന ഒരു കാര്യം തന്നെയാണ്. ഇതിനെ തടയാൻ വേണ്ടി നമുക്ക് എന്തെല്ലാം ചെയ്യാൻ സാധിക്കും എന്ന് നോക്കാം. മുടി കൊഴിച്ചിൽ വരാനുള്ള കാരണങ്ങൾ ഒരുപാടുണ്ട്. അത് നിങ്ങൾക്കെല്ലാവർക്കും സുപരിചിതമാണല്ലോ. എന്നാൽ എങ്ങനെയാണ് മുടി കൊഴിച്ചിലിനെ തടയേണ്ടത്. അല്ലെങ്കിൽ ഒരു പരിധിവരെ എങ്ങനെയാണ് കുറയ്ക്കാൻ സാധിക്കുക. വീണ്ടും മുടി തിരികെ കൊണ്ടുവരാൻ നമുക്ക് എന്തെല്ലാം ചെയ്യാൻ സാധിക്കും.??

Hair loss remedies

മൂന്ന് മുതൽ ആറ് മാസം വരെ മാത്രം ഡയറ്റ് ചെയ്യുന്ന ആളുകൾക്ക് മുടികൊഴിച്ചിൽ അത്രയധികമായി കണ്ടുവരാറില്ല. താൽക്കാലികമായി മുടികൊഴിച്ചിൽ ഉണ്ടായാലും ഏതാനും ആഴ്ചകൾക്കുള്ളിൽ തന്നെ അത് അപ്രത്യക്ഷമാകുന്നതാണ്. എന്നാൽ കൂടുതൽ നാളുകൾ ഡയറ്റ് ചെയ്യുന്നവർക്ക് അവരുടെ ശരീരം മുഴുവനും കീറ്റോ അഡാപ്റ്റഡ് അഥവാ കീറ്റോസിസ് എന്ന സമ്പൂർണ്ണമായ പ്രക്രിയ നടന്നു കഴിയുമ്പോൾ  ഒരു പാർശ്വഫലം എന്നതുപോലെ മുടി കൊഴിച്ചിൽ കണ്ടുവരുന്നു. എന്നാൽ വെറും 10 ശതമാനം ആളുകളിലെ ഇത് ഉണ്ടാകാറുള്ളൂ. അമിതവണ്ണം, കുടവയർ എന്നിങ്ങനെയുള്ള ജീവിതശൈലി രോഗങ്ങൾ കുറയ്ക്കുവാൻ വേണ്ടിയായിരിക്കും ഭൂരിഭാഗം ആളുകളും കീറ്റോ ഡയറ്റ് പിന്തുടരുന്നത്. അങ്ങനെയുള്ളവർ മൂന്ന് മുതൽ ആറ് മാസം കൊണ്ട് തന്നെ അവർ ആഗ്രഹിച്ച വെയ്റ്റ് ലോസ് നേടിയിരിക്കും. അവർ ഡയറ്റ് നിർത്തി സമീകൃതാഹാര രീതിയിലേക്ക് തിരിച്ചു വരുമ്പോൾ മുടികൊഴിച്ചിൽ പൂർണ്ണമായും നിൽക്കുന്നതാണ്. ചില ആളുകൾക്ക് ലോ കാർബ്‌ ഡയറ്റുകൾ മുടികൊഴിച്ചിലിനു കാരണമാകുന്നു എന്നത് നിഷേധിക്കാനാവാത്ത കാര്യം തന്നെയാണ്. അങ്ങനെയുള്ളവർക്ക് ലോ കാർബ് ഡയറ്റ് നിർത്തിയതിനുശേഷം കാർബോഹൈഡ്രേറ്റ് ഭക്ഷണ രീതിയിലേക്ക് തിരികെ വരാവുന്നതാണ്. മൂന്നു മുതൽ ആറു മാസം വരെ ഡയറ്റ് ചെയ്തതിനുശേഷം സാധാരണ ഭക്ഷണ രീതിയിലേക്ക് തിരിച്ചു വരുക എന്നതാണ് ഇതിനുള്ള പരിഹാരം. അത് അല്ലാത്തപക്ഷം കീറ്റോ ഡയറ്റ് തന്നെ മുന്നോട്ടു കൊണ്ടുപോകണം എന്നുള്ളവർക്ക് അഥവാ അവർ ആഗ്രഹിച്ച ശരീരഭാരത്തിലേക്ക് ഈ ഒരു കാലയളവിൽ  എത്തുവാൻ സാധിച്ചില്ലെങ്കിൽ മുടികൊഴിച്ചിലിനുള്ള പരിഹാരമാർഗ്ഗങ്ങൾ കാണേണ്ടതുണ്ട്.

10 മണിക്കൂർ ഉറങ്ങുക. ഇപ്രകാരം 10 മണിക്കൂർ ഉറങ്ങുന്നതുവഴി നമ്മുടെ ശരീരത്തിൻറെ   സ്ട്രെസ്സ് വളരെയധികം കുറയുന്നതാണ്. സ്ട്രെസ്സ് കുറയുന്നതോടുകൂടി ഹെയർ ഫോളിക്കിൾസിന് വളരാനുള്ള ഒരു സാഹചര്യം ഉണ്ടാകുന്നു. അടുത്തതായി നമ്മൾ കഴിക്കുന്ന ഭക്ഷണത്തിൽ ആവശ്യത്തിന് കലോറി ഉണ്ടായിരിക്കണം. സാധാരണ പുരുഷന്മാർക്ക് 1800 ഉം സ്ത്രീകൾക്ക് 1500 ഉം കിലോ കലോറി ഒരു ദിവസം ആവശ്യമായി വരുന്നു. മൂന്നുദിവസം തുടർച്ചയായി കഠിനമായ ഉപവാസം എടുക്കുന്ന ആളുകൾ അത് നിർത്തുകയും സാധാരണ രീതിയിലുള്ള ഇടവിട്ടുള്ള ഉപവാസത്തിലേക്ക് (Intermittent fasting) തിരിച്ചു വരികയും ചെയ്യേണ്ടതാണ്. ഇങ്ങനെ ഫാസ്റ്റിംഗിലേക്ക് തിരികെ വരുന്നവർ രണ്ട് നേരമെങ്കിലും ആവശ്യത്തിന് കലോറി അടങ്ങിയിട്ടുള്ള ഭക്ഷണങ്ങൾ കഴിക്കാൻ ശ്രദ്ധിക്കുക. തുടർച്ചയായി ഒരേ ഭക്ഷണം കഴിക്കാതെ ഡയറ്റിൽ അനുവദനീയമായ ഭക്ഷണങ്ങൾ കൂട്ടിക്കലർത്തി കഴിക്കാനായി ശ്രദ്ധിക്കുക. അതുപോലെ പ്രോട്ടീന്റെ അളവ് നമ്മൾ കഴിക്കുന്ന ഭക്ഷണത്തിൽ വളരെയധികം കുറഞ്ഞാൽ അതും മുടികൊഴിച്ചിലിന് കാരണമാകുന്നു.  മതിയായ മാംസ്യം ഓരോ ദിവസവും നമ്മുടെ ശരീരത്തിന് നമ്മൾ ലഭ്യമാക്കിയിരിക്കണം. ഉദാഹരണത്തിന് 80 കിലോ ശരീര ഭാരം ഉള്ള ഒരാൾ 80 ഗ്രാം പ്രോട്ടീൻ ഒരു ദിവസം ഭക്ഷണത്തിൽ ഉൾപ്പെടുത്തണം. ഭക്ഷണത്തിന് അര മണിക്കൂർ മുൻപെങ്കിലും വെള്ളം കുടിക്കാനായി ശ്രദ്ധിക്കണം. പ്രോട്ടീന്റെ ദഹനം ആരംഭിക്കുന്നത് നമ്മുടെ വയറിനുള്ളിൽ വച്ചാണ് . നമ്മുടെ വയറിനകത്തുള്ള ആസിഡിന്റെ അളവ് കുറഞ്ഞു പോയാൽ ശരിയായ ദഹനം നടക്കാതെ വരും. HCL അഥവാ ഹൈഡ്രോ ക്ലോറിക് ആസിഡ് ആണ് ദഹനത്തിന് സഹായിക്കുന്നത്. തുടർച്ചയായി വാട്ടർ ഫാസ്റ്റിംഗ് എടുക്കുന്ന ആളുകൾ ധാരാളമായി വെള്ളം കുടിക്കുന്നത് കൊണ്ട് ഈ ആസിഡ്  നേർമയാവുകയും അതിൻറെ വീര്യം കുറയാനും (Dilute) സാധ്യതയുണ്ട്. അപ്പോൾ പ്രോട്ടീൻ ശരിയായി ദഹിക്കാതെ വരുകയും അതുമൂലം ശരീരത്തിനാവശ്യമായ പ്രോട്ടീൻ ലഭ്യമാവാതിരിക്കുകയും ചെയ്യുന്നു. പ്രോട്ടീന്റെ ദഹനത്തിനെ ഒരു പരിധിവരെ സഹായിക്കാൻ ആപ്പിൾ സൈഡർ വിനാഗിരി സഹായിക്കുന്നു. അങ്ങനെയുള്ളവർക്ക്  രാത്രിയിലെ ഭക്ഷണത്തിനുശേഷം കിടക്കുന്നതിനു മുൻപായി ആപ്പിൾ സൈഡർ വിനാഗിരി കുടിക്കാവുന്നതാണ്. മൂന്നു മുതൽ ആറു മാസത്തിനുശേഷം കഠിനമായ മുടികൊഴിച്ചിൽ ഉള്ള ആളുകൾ ഡയറ്റിനോടൊപ്പം താഴെപ്പറയുന്ന ഡയറ്ററി സപ്ലിമെൻസ് കഴിക്കേണ്ടതാണ്.

  1. ZINC
  2. BIOTIN
  3. VITAMIN B6
  4. COPPER
  5. SILICA
  6. TRACE MINERAL
  7. COLLAGEN

    ദിവസവും ഇലക്കറികൾ മൂന്നോ നാലോ കപ്പ് ഭക്ഷണത്തിൽ ഉൾപ്പെടുത്തേണ്ടത് അനിവാര്യമാണ്. കീറ്റോ ഡയറ്റ് എടുക്കുന്നത് മൂലമുണ്ടാകുന്ന മുടി കൊഴിച്ചിൽ കുറയാൻ ഒരുപക്ഷേ രണ്ടു മുതൽ മൂന്നു മാസം വരെ എടുത്തേക്കാം. ആ ഒരു കാലഘട്ടത്തിൽ നിങ്ങൾ മുകളിൽ പറഞ്ഞ സപ്ലിമെന്റ്സ് എടുക്കുകയാണെങ്കിൽ ഒരുപരിധിവരെ മുടികൊഴിച്ചിലിനെ കുറയ്ക്കാനാകും. മുടി കൊഴിച്ചിലിനെ പ്രതി ആരും പരിഭ്രാന്തരാകേണ്ട ആവശ്യമില്ല. കൂടുതൽ കാലത്തേക്ക് ഡയറ്റ് തുടരുന്നവരാണ് ഇത്തരത്തിൽ മുൻകരുതലുകൾ എടുക്കേണ്ടത്.

Bullet Coffee

Bullet Coffee

How to prepare Bullet proof coffee in Malayalam

KETO BULLET PROOF COFFEE

എന്തിനുവേണ്ടിയാണ് കീറ്റോ ഡയറ്റിൽ ബട്ടർ കോഫി കുടിക്കുവാൻ പറയുന്നത്.? അത് എപ്രകാരമാണ് തയ്യാറാക്കേണ്ടത്?

ആദ്യത്തെ ആഴ്ചകളിൽ ബട്ടർ കോഫിയേക്കാൾ നല്ലത് ബുള്ളറ്റ് പ്രൂഫ് കോഫി ആണ്. കാരണം ഡയറ്റ് തുടങ്ങുന്ന ആദ്യത്തെ രണ്ടാഴ്ച നമുക്ക് തലവേദന,ക്ഷീണം തുടങ്ങിയ അസ്വസ്ഥതകൾ ഉണ്ടാകുന്നത് സ്വാഭാവികം. നമ്മൾ വർഷങ്ങളായി പിന്തുടർന്നിരുന്ന കാർബോഹൈഡ്രേറ്റ് മെറ്റബോളിസത്തിൽനിന്നും ഫാറ്റ് മെറ്റബോളിസത്തിലേക്ക് മാറുമ്പോൾ ഇത്തരം അസ്വസ്ഥതകൾ കണ്ടുവരുന്നുണ്ട്. ഈ അസ്വസ്ഥതകളെ അതിജീവിക്കാനുള്ള ഏറ്റവും നല്ല പരിഹാരമാർഗമാണ് ബുള്ളറ്റ് പ്രൂഫ് കോഫി. ഇതിൽ ചേർക്കുന്ന വെളിച്ചെണ്ണയിൽ നിന്ന് നമുക്ക് ആവശ്യത്തിനുള്ള കീറ്റോൺസ് ലഭിക്കുന്നു. ദീർഘനേരം വിശപ്പിനെ നിയന്ത്രിക്കാനും ഭക്ഷണങ്ങളോട് ഉള്ള ആർത്തിയെ തടയാനും ഇത് സഹായിക്കുന്നു. ഒരു മാസത്തിനുശേഷം ബുള്ളറ്റ് പ്രൂഫ് coffee നിർത്താവുന്നതാണ്.

ഉണ്ടാക്കുന്ന വിധം

ഒരു ഗ്ലാസ് വെള്ളത്തിൽ ചിക്കറി ഇല്ലാത്ത ഒരു ടീസ്പൂൺ കോഫീ പൗഡർ ഇട്ട് നന്നായി തിളപ്പിക്കുക. ഇതിലേക്ക് ചേർക്കേണ്ട ബട്ടർ Grass Fed Butter ആയിരിക്കണം. ഒരു പ്രാവശ്യം ബട്ടർ കോഫി ഉണ്ടാക്കാൻ 25 ഗ്രാം ബട്ടർ ആണ് ആവശ്യം ഉള്ളത്. ബട്ടർ മുറിച്ച് ഒരു ഗ്ലാസ്സിലേക്ക് ഇട്ടതിനുശേഷം തിളപ്പിച്ച് വെച്ച കോഫിയുടെ പകുതി ആ ഗ്ലാസിലേക്ക് ഒഴിക്കുക. ഇങ്ങനെ മാറ്റിവയ്ക്കുന്നത് ചൂടോടുകൂടി കോഫി കുടിക്കാൻ വേണ്ടിയാണ്. ഗ്ലാസിലേക്ക് രണ്ട് ടീസ്പൂൺ ശുദ്ധമായ വെളിച്ചെണ്ണ ചേർക്കുക. ശേഷം നന്നായി മിക്സ് ചെയ്തു എടുക്കുക. ഒരു blender ന്റെ സഹായത്തോടെ നിങ്ങൾക്ക് കോഫി മിക്സ് ചെയ്യാവുന്നതാണ്. നന്നായി യോജിപ്പിച്ചതിനുശേഷം മാറ്റിവെച്ച കോഫിയും ഇതിലേക്ക് ചേർക്കാവുന്നതാണ്. (നല്ലതു പോലെ ചൂട് വേണമെന്നുണ്ടെകിൽ രണ്ടാമതും ചൂടാക്കിയ ശേഷം ചേർക്കുക.) കുടിക്കുന്നതിനു മുൻപ് അര ടീസ്പൂൺ അല്ലെങ്കിൽ ഒരു ടീസ്പൂൺ മധുരമില്ലാത്ത കൊക്കോപൗഡർ ആഡ് ചെയ്തു നന്നായി യോജിപ്പിക്കുക. ചൂടോടെ കുടിക്കുക.

×

Hello!

Click one of our contacts below to chat on WhatsApp

× Contact us