Intermittent fasting in malayalam

Intermittent fasting in malayalam

ഇന്റർമിറ്റന്റ് ഫാസ്റ്റിംഗ് അതായത് ഇടവിട്ടുള്ള ഉപവാസം  എന്നാൽ എന്ത് ? ഇതുകൊണ്ടുള്ള ഗുണങ്ങൾ എന്തൊക്കെയാണ്? എപ്രകാരമാണ് ഉപവാസം എടുക്കേണ്ടത് ? ഡയറ്റ് ഫോളോ ചെയ്യുന്നവർക്ക് ഉപവാസ ക്രമം എപ്രകാരമാണ് ഉപകാരം ആകുന്നത്. നമുക്ക് അറിയാവുന്നതുപോലെ എല്ലാ മതങ്ങളിലും നിലനിൽക്കുന്ന  ഒരു ആചാരമാണ്  ഉപവാസം അല്ലെങ്കിൽ നോമ്പ്. കാലങ്ങളോളം പഴക്കമുള്ള ഒരു സമ്പ്രദായം കൂടിയാണ്   ഉപവാസം . എന്താണ് ഇതിൻറെ പ്രാധാന്യം എന്ന് പുതിയ തലമുറയിലുള്ള പലർക്കും അറിയുന്നില്ല. പഴയ കാര്യങ്ങൾ അപ്പാടെ അവഗണിച്ചുകൊണ്ട് ജീവിക്കുന്നത് ആണല്ലോ പുതിയ തലമുറയുടെ ഒരു രീതി. ശാസ്ത്രീയ പഠനങ്ങളുടെ അടിസ്ഥാനത്തിൽ തെളിയിക്കപ്പെട്ട ഒരു സംഭവമാണ് ഇടവിട്ടുള്ള ഉപവാസം . ലക്ഷക്കണക്കിന് രോഗങ്ങളുടെ സൗഖ്യത്തിന് കാരണമാകുന്ന ഒരു ഫുഡ് പാറ്റേൺ  ആണ് ഇത്.  ക്യാൻസർ, മെറ്റബോളിക് ഡിസോർഡറുകളായ പ്രമേഹം, തൈറോയ്ഡ്, ഹോർമോൺ അസന്തുലിതാവസ്ഥ തുടങ്ങിയ ഒരുപാട് രോഗങ്ങൾക്ക് മാറ്റം വരുത്തുന്ന ഒന്നാണ് ഇൻറർമിറ്റൻഡ് ഫാസ്റ്റിംഗ് അഥവാ ഇടവിട്ടുള്ള ഉപവാസം. എങ്ങനെയാണ് ഇടവിട്ടുള്ള ഉപവാസം നമ്മുടെ ശരീരത്തിൽ പ്രവർത്തിക്കുന്നത് ? ഉപവാസം എന്ന് പറയുമ്പോൾ എല്ലാവരുടെയും മനസ്സിലേക്ക് കടന്നുവരുന്നത് പട്ടിണി കിടക്കുക എന്നത് ആണ്.   അങ്ങനെ പട്ടിണി കിടക്കുകയല്ല ഇടവിട്ടുള്ള ഉപവാസത്തിന്റെ ലക്ഷ്യം. ഇവിടെ നമ്മൾ പൂർണ്ണമായും ഭക്ഷണം ഉപേക്ഷിക്കുന്നില്ല. ഇതിന് ഒരു പാറ്റേൺ അല്ലെങ്കിൽ ആനുപാതം ഉണ്ട്. ഇന്റർമിറ്റന്റ് ഫാസ്റ്റിംഗ് ഒരിക്കലും ഒരു ഡയറ്റ് അല്ല. ഭക്ഷണത്തെ ഒരു സമയപരിധി യിലേക്ക് ക്രമീകരിക്കുന്ന പ്രക്രിയയാണ് ഇത്. ഈ ക്രമീകരണം കൊണ്ടാകട്ടെ അനേകായിരം ഗുണങ്ങൾ നമ്മുടെ ശരീരത്തിന് സംഭവിക്കുന്നു. വായു അല്ലെങ്കിൽ ഗ്യാസ് സംബന്ധമായ പ്രശ്നങ്ങൾ എല്ലാം ഇവിടെ പരിഹരിക്കപ്പെടുന്നു. ഇനി  എങ്ങനെയാണ് ഇന്റർമിറ്റന്റ് ഫാസ്റ്റിംഗ് ശരീരത്തിൽ പ്രവർത്തിക്കുന്നത് എന്ന് നോക്കാം. മനുഷ്യ ശരീരത്തിലെ ഏറ്റവും പ്രധാനപ്പെട്ട ഹോർമോണുകളിൽ ഒന്നാണ് ഇൻസുലിൻ. പ്രമേഹരോഗം ക്രമാതീതമായി വർധിച്ചിരിക്കുന്ന ഈ കാലഘട്ടത്തിൽ ഇൻസുലിൻ ഹോർമോണിനെ കുറിച്ച് മിക്കവാറും എല്ലാവർക്കും നന്നായി അറിയാം. പ്രത്യേകിച്ച് ടൈപ്പ് വൺ പ്രമേഹ രോഗം ഉള്ളവർക്ക്, അവർ ഇൻസുലിൻ ഇഞ്ചക്ഷൻ ചെയ്യുന്നതുകൊണ്ട്  ഇൻസുലിൻ എന്ന പേര് അവർക്ക് സുപരിചിതമാണ്. നമ്മുടെ ശരീരത്തിലെ പാൻക്രിയാസ് എന്ന അവയവമാണ് ഇൻസുലിൻ ഹോർമോണിനെ ഉൽപാദിപ്പിക്കുന്നത്. രക്തത്തിലുള്ള പഞ്ചസാരയുടെ അളവ് നിയന്ത്രിക്കുന്നതിൽ ഇൻസുലിൻ  പ്രധാന പങ്ക് വഹിക്കുന്നു. അമിതമായ അളവിൽ രക്തത്തിൽ പഞ്ചസാര വർദ്ധിക്കുമ്പോൾ അതിനെ ബാലൻസ് ചെയ്യുന്നത് ഇൻസുലിൻ  ഹോർമോൺ ആണ് . ഇതുവരെ പറഞ്ഞ കാര്യങ്ങളിൽ ഇൻസുലിൻ വളരെ സഹായകരമാണ് എങ്കിലും, ഇതിനു മറ്റൊരു വശം കൂടിയുണ്ട്. അമിതമായി വരുന്ന പഞ്ചസാരയെ ഇൻസുലിൻ ഗ്ലൈക്കോജൻ ആക്കി മാറ്റുന്നു. അതുപോലെതന്നെ അധികം വരുന്ന പഞ്ചസാരയെ കൊഴുപ്പ് ആക്കിയും മാറ്റുന്നു. അങ്ങനെ ഫാറ്റ് മെറ്റബോളിസത്തെ ഇത് ബാധിക്കുന്നു. അതേപോലെ പ്രോട്ടീൻ മെറ്റബോളിസത്തെയും ബാധിക്കുന്നു. കാരണം ആവശ്യമുള്ള  അളവിൽ ഗ്ലൂക്കോസ് അല്ലെങ്കിൽ അന്നജം ശരീരത്തിൽ ഇല്ലെങ്കിൽ മസിലുകളിൽ നിന്ന് പ്രോട്ടീൻ  എടുക്കുകയും അവയെ ഗ്ലൂക്കോസ് ആക്കി മാറ്റുകയും ചെയ്യുന്നു. അതുപോലെ കൊഴുപ്പിനെ ഉപയോഗിച്ച് ഗ്ലൂക്കോസ് ആക്കി മാറ്റുകയും ചെയ്യുന്നു. എന്നാൽ ഇൻസുലിൻ എന്ന ഹോർമോണിന് കൊഴുപ്പിനെ നേരിട്ട് ഉപയോഗിച്ച് ഗ്ലൂക്കോസ് ആക്കി മാറ്റാൻ കഴിയില്ല. അതുകൊണ്ടുതന്നെ  പ്രോട്ടീനാണ്  ഇവിടെ കൂടുതൽ ബാധിക്കപ്പെടുന്നത്. അതായത് ഫാറ്റ് മെറ്റബോളിസത്തെ ഇൻസുലിൻ ബാധിക്കുമ്പോൾ പ്രോട്ടീനെ നേരിട്ട് എഫക്ട് ചെയ്യുന്നു. അടുത്തതായി കൊളസ്ട്രോളിന്റെ ഉൽപാദനത്തിലും പ്രത്യേകിച്ച് ട്രൈഗ്ലിസറൈഡിൻറെ ഉത്പാദനത്തിൽ ഇൻസുലിൻ പങ്കുവഹിക്കുന്നു.  ഫാറ്റി ലിവർ ഉണ്ടാകുന്നതിന് ഒരു കാരണം ഇൻസുലിൻ ഹോർമോൺ ആണ്.  ആർട്ടെറീസിന് കട്ടികൂട്ടി ബ്ലഡ് പ്രഷർ അധികം ആകാനും ഇൻസുലിൻ കാരണമാകുന്നു. മറ്റൊരു പ്രധാന കാര്യം ഇൻസുലിൻ നമ്മുടെ ശരീരത്തിൽ ഉള്ളിടത്തോളം കാലം കൊഴുപ്പ് ഒരിക്കലും ഉരുകുകയില്ല . വ്യക്തമായി പറഞ്ഞാൽ അമിതമായ ശരീരഭാരം മൂലം ബുദ്ധിമുട്ടുന്നവരുടെ ശരീരത്തിൽ ഇൻസുലിൻ ഹോർമോണിൻറെ അളവ് കൂടുതലാണെങ്കിൽ അവർക്ക് ഒരിക്കലും ഭാരം കുറയ്ക്കാൻ സാധിക്കുന്നില്ല. അതേപോലെ അമിതമായ അളവിൽ രക്തത്തിൽ പഞ്ചസാര അല്ലെങ്കിൽ ഗ്ലൂക്കോസ്  ഉണ്ടാകുമ്പോൾ അതിനെ കൊഴുപ്പായി മാറ്റുകയും ചെയ്യുന്നു. അങ്ങനെയാണ് ഇൻസുലിൻ ഫാറ്റിലിവർ ഉണ്ടാകാൻ കാരണം ആകുന്നത്. ശരീരഭാരം കുറയ്ക്കാൻ കഠിനമായ വ്യായാമമുറകൾ ചെയ്യുകയും ജിമ്മിൽ പോവുകയും ചെയ്യുന്നവർക്ക് ഒരു പ്രധാന വില്ലനാണ് ഇൻസുലിൻ ഹോർമോൺ. ആവശ്യത്തിന് പ്രോട്ടീൻ ലഭിച്ചില്ലെങ്കിൽ മസിലുകളിൽ നിക്ഷേപിക്കപ്പെട്ടിട്ടുള്ള പ്രോട്ടീനെ ഇൻസുലിൻ ഉപയോഗിക്കുന്നു. അങ്ങനെ മസിലുകൾ നഷ്ടപ്പെടാൻ ഇടയാകുന്നു. ഇൻസുലിൻ ഹോർമോൺ മൂലം ഉണ്ടാകുന്ന മറ്റൊരു പ്രശ്നമാണ് അമിതമായ വിശപ്പ്.  നമ്മിൽ ഭക്ഷണത്തോടുള്ള അമിതമായ ആർത്തിയും ആസക്തിയും ഉണ്ടാക്കുന്ന ഹോർമോൺ കൂടിയാണ് ഇൻസുലിൻ . എന്തുകൊണ്ടാണ് ഇൻസുലിൻ ഇത്രയേറെ നമ്മുടെ ശരീരത്തിൽ ഉത്പാദിപ്പിക്കപ്പെടുന്നത് ? നമ്മൾ കഴിക്കുന്ന ഭക്ഷണത്തിലൂടെ അമിതമായ അളവിൽ കാർബോഹൈഡ്രേറ്റ് അല്ലെങ്കിൽ അന്നജം നമ്മുടെ രക്തത്തിൽ എത്തുമ്പോൾ അവിടെ ഇൻസുലിനും കൂടുതൽ ഉൽപാദിപ്പിക്കപ്പെടുന്നു. അതേപോലെ പ്രോട്ടീൻ അളവ് കൂടുമ്പോഴും ഇൻസുലിൻ കൂടുതൽ ഉൽപാദിപ്പിക്കപ്പെടുന്നു. സ്വാഭാവികമായും കാർബോഹൈഡ്രേറ്റും പ്രോട്ടീനും അല്ലാതെ മറ്റെന്താണ് കഴിക്കുക എന്ന് നിങ്ങൾ ചിന്തിച്ചേക്കാം. കഴിക്കുന്ന ഭക്ഷണത്തിൽ മാത്രം  അല്ല  രീതിയിലും കൂടിയാണ് നാം മാറ്റം വരുത്തേണ്ടത്. നമ്മുടെ ഭക്ഷണരീതി എന്ന് പറയുന്നത് മൂന്നുനേരം ആണ് . പ്രഭാതഭക്ഷണം, ഉച്ചഭക്ഷണം, അത്താഴം . ഭക്ഷണം കഴിച്ചു കഴിഞ്ഞാൽ ഇൻസുലിന്റെ അളവ് ഉയരുന്നു. നമ്മൾ ഈ മൂന്നു നേരത്തെ ഭക്ഷണം മാത്രമല്ല കഴിക്കുന്നത്. ഇട നേരത്തുള്ള സ്നാക്കിംഗ് നമ്മുടെ എല്ലാവരുടെയും ശീലമാണ്. മൂന്നു നേരത്തെ ഭക്ഷണം കഴിക്കുമ്പോൾ ഇൻസുലിൻ രക്തത്തിൽ ഉയരുന്നത് പോലെ തന്നെ ഇട നേരത്തുള്ള സ്നാക്കിംഗിന്റെ സമയത്തും ഇൻസുലിൻ ഉൽപാദിപ്പിക്കപ്പെടുന്നു. അങ്ങനെ ക്രമം തെറ്റിയുള്ള നമ്മുടെ ഭക്ഷണശീലം മൂലം അമിതമായ അളവിൽ ഇൻസുലിൻ ഉൽപാദിപ്പിക്കപ്പെടുന്നു. ഇട നേരത്ത് ഒരു ചെറിയ ബിസ്കറ്റ് ആണെങ്കിൽ പോലും അവിടെ ഇൻസുലിൻ ഉൽപാദിപ്പിക്കപ്പെടുന്നുണ്ട്. നിലവിൽ ഇതിനുള്ള പരിഹാരം എന്ന് പറയുന്നത് ഇൻസുലിൻ ഉൽപാദനത്തെ നിയന്ത്രിക്കാനുള്ള സാഹചര്യം ഉണ്ടാക്കുക എന്നതാണ്. ഇതിനുള്ള ഏക പോംവഴി ഇടവിട്ടുള്ള ഉപവാസം അതായത് ഇന്റർമിറ്റന്റ് ഫാസ്റ്റിംഗ് ആണ് . ഇനി ഇന്റർമിറ്റന്റ് ഫാസ്റ്റിംഗ് എങ്ങനെ ചെയ്യാം. ആദ്യമേ സൂചിപ്പിച്ചതുപോലെ അത് ഒരു ഡയറ്റ് അല്ല.  ഇൻസുലിൻ ഉൽപാദനത്തെ നിയന്ത്രിക്കാനും ഇൻസുലിൻ അളവ് താഴ്ത്താനും ഉള്ള ഒരു ഭക്ഷണ സമയ ക്രമീകരണമാണ് ഇന്റർമിറ്റന്റ് ഫാസ്റ്റിംഗ്. ഇതിൻറെ ആദ്യപടി എന്ന് പറയുന്നത്  പ്രധാന ഭക്ഷണങ്ങൾക്ക് ഇടയിലുള്ള സ്നാക്സ് പൂർണമായും ഒഴിവാക്കുക എന്നതാണ്. കൂടുതൽ വ്യക്തമായി പറഞ്ഞാൽ പ്രഭാതഭക്ഷണം, ഇടയിലുള്ള ഒരു സ്നാക്ക്, ഉച്ചഭക്ഷണം, നാലുമണിക്ക് ചായ ഒരു പലഹാരം, ഡിന്നർ ഡിന്നറിനു ശേഷം മറ്റെന്തെങ്കിലും കൊറിക്കൽ. ഇതെല്ലാം കഴിഞ്ഞ് ഉറങ്ങാൻ കിടക്കുമ്പോൾ ഉറങ്ങുന്ന സമയം ഏകദേശം ആറ് മുതൽ എട്ട് മണിക്കൂർ വരെ മാത്രമാണ് നിങ്ങൾക്ക് ഉപവസിക്കാൻ സാധിക്കുന്നത്. എടുത്തുചാടി കൂടുതൽ നേരം ഉപവസിക്കാൻ നമുക്ക് ബുദ്ധിമുട്ടാണ്. മാത്രമല്ല അതു മറ്റു പല ആരോഗ്യപ്രശ്നങ്ങൾക്കും കാരണമാകും. ആദ്യപടിയായി നമുക്ക് ഒരു 12 മണിക്കൂർ ഉപവാസത്തിൽ ആരംഭിക്കാം. ഈ ഉപവാസ ക്രമത്തിൽ മൂന്നു നേരം ഭക്ഷണം മാത്രമാക്കി ചുരുക്കണം. രാത്രി 8 മണിക്ക് മുൻപ് ഭക്ഷണം കഴിക്കണം. രാവിലെ എട്ടുമണിക്ക് പ്രഭാതഭക്ഷണം ആരംഭിച്ച് രാത്രി 8 മണിയോടെ അത്താഴം കഴിക്കുന്നവർക്കാണ് 12 മണിക്കൂർ ഉപവാസം എടുക്കാൻ കഴിയുകയുള്ളൂ. എന്നാൽ 12 മണിക്കൂർ ഉപവാസം എല്ലാവർക്കും അത്ര പ്രയോജനകരം അല്ല. എന്നാൽ പ്രസവത്തിനുശേഷം ശരീരഭാരം കൂടാതെ നിലനിർത്താൻ സ്ത്രീകൾക്ക് ഇത് പ്രയോജനകരമാണ്. കുഞ്ഞു ജനിച്ചതിനു ശേഷം ഒരു ആറുമാസം തീർച്ചയായും ഡയറ്റുകൾ എല്ലാം മാറ്റിവെച്ച് കൃത്യമായി ആരോഗ്യകരമായ ഭക്ഷണങ്ങൾ കഴിക്കണം.  ആറുമാസത്തിനുശേഷം 12 മണിക്കൂർ ഉപവാസത്തിലൂടെ ഇന്റർമിറ്റന്റ് ഫാസ്റ്റിംഗ് ആരംഭിക്കാം. എന്നാൽ മറ്റെല്ലാവർക്കും പ്രയോജനകരമായ ഇന്റർമിറ്റന്റ് ഫാസ്റ്റിംഗ് എന്നു പറയുന്നത് 16 മണിക്കൂർ ഉപവാസം ആണ്. ശരിയായ ഇന്റർമിറ്റന്റ് ഫാസ്റ്റിംഗ് ആരംഭിക്കുന്നത് 16 മണിക്കൂറിൽ നിന്നാണ്. ഉദാഹരണത്തിന് ഇന്ന് രാവിലെ 10 മണിക്ക് പ്രഭാത ഭക്ഷണം കഴിക്കുന്നു. രണ്ടുമണിക്ക് ഉച്ചഭക്ഷണം, ആറുമണിക്ക് അത്താഴം . ബാക്കി 16 മണിക്കൂർ ഉപവസിക്കുക.  ഇനി 20 മണിക്കൂറിന്റെ കാറ്റഗറി ഉണ്ട്. 16 മണിക്കൂർ ഇന്റർമിറ്റന്റ് ഫാസ്റ്റിംഗിൽ മൂന്നുനേരം നമ്മൾ ഭക്ഷണം കഴിച്ചു എങ്കിൽ 20 മണിക്കൂർ ഇന്റർമിറ്റന്റ് ഫാസ്റ്റിംഗിൽ രണ്ടു നേരം മാത്രമാണ് നാം ഭക്ഷണം കഴിക്കുന്നത്. ഉദാഹരണത്തിന് പ്രഭാതഭക്ഷണം പത്തുമണിക്കും ഉച്ചഭക്ഷണം രണ്ടുമണിക്കുമാക്കി ചുരുക്കണം. എന്നാൽ ഭക്ഷണം ഏത് സമയത്ത് കഴിക്കണം എന്നുള്ളത് സ്വയം താല്പര്യം ആണ്. എന്നാൽ ഒരു 20 മണിക്കൂർ ഉപവസിക്കുക എന്നതാണ് പ്രാധാന്യം. അവസാനത്തെ കാറ്റഗറി എന്നു പറയുന്നത് 24 മണിക്കൂറിന്റേതാണ്.  അതായത് ഒരു നേരം മാത്രം ഭക്ഷണം കഴിക്കുകയും ബാക്കി സമയം ഉപവസിക്കുകയും ചെയ്യുക. ഒരു നേരം മാത്രം ഭക്ഷണം കഴിച്ചു കൊണ്ട് ഉപവസിച്ച അനേകം ആളുകളിൽ ഒരു കൂട്ടം ശാസ്ത്രജ്ഞന്മാർ നടത്തിയ പരീക്ഷണം വൻവിജയം കണ്ടെത്തിയിരുന്നു. ഇങ്ങനെ ദീർഘനേരം ഉപവസിക്കുന്നത് മനുഷ്യശരീരത്തിന് എന്തുമാത്രം ഉപകാരപ്രദമാണ് എന്ന് തെളിയിക്കപ്പെട്ട വസ്തുതയാണ്. എന്നാൽ എടുത്തുചാടി ഇത്രയും ദീർഘനേരം ഉപവാസം എടുക്കുന്നത് നല്ലതല്ല. പടിപടിയായി വേണ്ട മുൻകരുതലുകൾ എല്ലാം സ്വീകരിച്ച് വേണം എപ്പോഴും ഉപവാസം എടുക്കാൻ. ഇനി ഇന്റർമിറ്റന്റ് ഫാസ്റ്റിംഗിൽ കഴിക്കാൻ പറ്റുന്ന ഭക്ഷണങ്ങൾ ഏതൊക്കെയാണ് എന്ന് നോക്കാം. ഇന്റർമിറ്റന്റ് ഫാസ്റ്റിംഗിന്റെ ആദ്യത്തെ കാറ്റഗറി ആയ 16:8 എന്ന പാറ്റേൺ നമുക്ക് ഇപ്പോൾ തിരഞ്ഞെടുക്കാം.  ഉപവസിക്കുന്ന 16 മണിക്കൂറിനെ ഫാസ്റ്റിംഗ് വിന്ഡോ എന്നും ഭക്ഷണം കഴിക്കുന്ന 8 മണിക്കൂറിന് ഈറ്റിംഗ് വിന്ഡോ എന്നും പറയുന്നു.  ഇന്റർമിറ്റന്റ് ഫാസ്റ്റിംഗിൽ നമുക്ക് സൗകര്യപ്രദമായ സമയം വേണം എപ്പോഴും തിരഞ്ഞെടുക്കാൻ. ജോലിക്ക് പോകുന്നവർക്കും വീട്ടിൽ ഇരിക്കുന്നവർക്കും ഒരേസമയം ഉപവസിക്കാൻ സാധിക്കില്ല. ഒരു ദിവസം 1200 കലോറിയിൽ കൂടുതൽ ഭക്ഷണം കഴിക്കാൻ പാടുള്ളതല്ല. കഴിക്കുന്ന ഭക്ഷണത്തിലെ കലോറി കണ്ടുപിടിക്കാൻ നിരവധി ആപ്ലിക്കേഷനുകൾ ഇന്ന് ലഭ്യമാണ്. അത് എല്ലാവർക്കും പ്രയോജനപ്പെടുത്താവുന്നതാണ്. വ്യായാമം ചെയ്യുന്ന ആളുകൾ ഇന്റർമിറ്റന്റ് ഫാസ്റ്റിംഗ് അവസാനിക്കുന്നതിനു തൊട്ടു മുൻപായി വ്യായാമം ചെയ്യാൻ ശ്രദ്ധിക്കേണ്ടതാണ്. ഉയർന്ന അന്നജം ഉള്ള ഭക്ഷണങ്ങൾ കുറയ്ക്കണം. പ്രഭാതഭക്ഷണമായി ഓംലെറ്റ്, ബ്രൗൺ ബ്രഡ്, കുക്കുംബർ ജ്യൂസ് തുടങ്ങിയവ ഉൾപ്പെടുത്താം. അധികം ഊർജ്ജമോ മധുരമോ ഇല്ലാത്ത  പേരയ്ക്ക, ഗ്രേപ്പ് ഫ്രൂട്ട്, പിയേഴ്സ്, തണ്ണിമത്തൻ, സ്ട്രോബറി മുതലായ പഴവർഗ്ഗങ്ങൾ അല്പം കഴിക്കാം. നാലുമണിക്ക്  ചായ കുടിക്കുന്ന ശീലം ഉള്ളവർക്ക്  ഗ്രീൻ ടീ, മധുരമില്ലാത്ത കട്ടൻ ചായ, കട്ടൻകാപ്പി, പാൽ ചായ, പാൽ കാപ്പി, മോര് വെള്ളം ഇങ്ങനെ എന്തെങ്കിലും കുടിക്കാം. ബദാം, വാൾനട്ട്, അണ്ടിപ്പരിപ്പ് തുടങ്ങിയ എന്തെങ്കിലും നട്സും കൂടെ ഉൾപ്പെടുത്താവുന്നതാണ്. അത്താഴത്തിന് ബോൺ ബ്രോത്, വെജിറ്റബിൾ സൂപ്പ് തുടങ്ങിയവ ചെറിയ അളവിൽ ഉൾപ്പെടുത്താം.  അല്ലാത്തവർക്ക് ഇറച്ചിയോ മീനോ നൂറുഗ്രാം ഉൾപ്പെടുത്താം. വെജിറ്റേറിയൻ ആണെങ്കിൽ കോളിഫ്ലവർ, വഴുതനങ്ങ, പനീർ, ബ്രോക്കോളി, കൂൺ തുടങ്ങിയവ ഉൾപ്പെടുത്താം. വെജിറ്റബിൾ സലാഡ് അല്ലെങ്കിൽ ഉപ്പേരി, തോരൻ ഒരു ദിവസം 150 ഗ്രാം എങ്കിലും കഴിക്കണം. ഉപവാസ സമയത്ത് മൂന്ന് ലിറ്റർ വരെ ശരാശരി വെള്ളം കുടിക്കണം. മധുരമില്ലാത്ത കട്ടൻചായ കട്ടൻ കാപ്പി എന്നിവ വേണമെങ്കിൽ ഉൾപ്പെടുത്താം. ഗ്രീൻ ടീ കുടിയ്ക്കുന്നതും അനുവദനീയമാണ്. ഹിമാലയൻ പിങ്ക് സാൾട്ട് ചേർത്ത് നാരങ്ങ വെള്ളം കുടിക്കുന്നത് ക്ഷീണം അകറ്റാൻ സഹായിക്കും. പാർശ്വഫലങ്ങളില്ലാതെ ഇൻറർമിറ്റന്റ് ഫാസ്‌റ്റിംഗ് എങ്ങനെ ചെയ്യാം ? ഇടവിട്ടുള്ള ഉപവാസത്തിന്റെ ലിസ്റ്റിൽ തന്നെ ഏറ്റവും ഫലപ്രദം ആയിട്ടുള്ളത് 24 മണിക്കൂറിൻറെ ഫാസ്റ്റിംഗ് ആണ്. കീറ്റോ ഡയറ്റ് ചെയ്യുന്നവരാണെങ്കിൽ എന്തെങ്കിലും ചീറ്റ് മീൽ കഴിച്ചതിനുശേഷം ആണ് ഉപവാസം എടുക്കാറുള്ളത്. അവർക്കും ഒരു ദിവസം ഒരു നേരം ആഹാരം കഴിച്ചു കൊണ്ട് ഉപവസിക്കുന്നതാണ് നല്ലത്. എന്നാൽ മൂന്നു ദിവസത്തിൽ കൂടുതൽ തുടർച്ചയായി 24 മണിക്കൂർ ഉപവസിക്കുന്നത് നല്ലതല്ല. തുടർച്ചയായി ഉപവസിച്ചാൽ വൈറ്റമിന്റെയും ന്യൂട്രിയൻസിന്റേയും അഭാവത്തിനും ശക്തമായ മുടികൊഴിച്ചിലിനും കാരണമാകുന്നു. അതിനാൽ രണ്ട് ദിവസത്തിൽ കൂടുതൽ 24 മണിക്കൂർ ഉപസിക്കാതിരിക്കുന്നതാണ് നല്ലത്. അങ്ങനെ തുടർച്ചയായി ഇന്റർമിറ്റന്റ് ഫാസ്റ്റിംഗ് എടുക്കാൻ താല്പര്യമുള്ളവർ ആണെങ്കിൽ അവർക്ക് രണ്ടുദിവസം 24 മണിക്കൂറിന്റെ ഉപവാസം എടുത്തതിനുശേഷം മൂന്നാം ദിവസം നോർമൽ ഭക്ഷണരീതി പിന്തുടരാവുന്നതാണ്. അതു കഴിഞ്ഞ് വീണ്ടും  ഒരു നേരം ഭക്ഷണം കഴിച്ചു കൊണ്ട് ഫാസ്റ്റിംഗ് ചെയ്യാം. അതായത് രണ്ടു ദിവസത്തെ ഉപവാസം കഴിഞ്ഞാൽ ഒരു ദിവസത്തെ ഇടവേള കൊടുക്കണം. എന്നാൽ ഒരു നേരം ഭക്ഷണം കഴിക്കുന്ന സമയത്ത് ഒരുപാട് ഭക്ഷണങ്ങൾ വാരിവലിച്ച് കഴിക്കാതിരിക്കാൻ ശ്രദ്ധിക്കണം. ഫാസ്റ്റിംഗ് അവസാനിപ്പിക്കുന്ന സമയത്ത് ലഘുവായ എന്തെങ്കിലും ഭക്ഷണങ്ങൾ കഴിക്കുക. പിന്നീട് ഒരു മണിക്കൂറിനു ശേഷം മാത്രമേ ഹെവി ആയ  ഭക്ഷണങ്ങൾ കഴിക്കാൻ പാടുള്ളൂ. ഫാസ്റ്റിംഗ് ബ്രേക്ക് ചെയ്യുന്ന സമയത്ത് പ്രോട്ടീൻ അധികമുള്ള ഭക്ഷണങ്ങൾ കഴിക്കുന്നതാണ് നല്ലത്. ബോൺ ബ്രോത്ത്, സൂപ്പ് തുടങ്ങിയവ വളരെ പ്രയോജനകരമാണ്. ചുരുക്കിപ്പറഞ്ഞാൽ 25% ഭക്ഷണം ഫാസ്റ്റിംഗ് അവസാനിപ്പിക്കുമ്പോഴും ബാക്കി 75% ഒരു മണിക്കൂറിന് ശേഷവും ആയി തരംതിരിച്ച്  കഴിക്കുക. കൊഴുപ്പും പ്രോട്ടീനും അടങ്ങിയ ഭക്ഷണം വേണം ഇന്റർമിറ്റന്റ് ഫാസ്റ്റിംഗ് കാലയളവിൽ നിങ്ങൾ കഴിക്കേണ്ടത്.  അതോടൊപ്പം ധാരാളം പച്ചക്കറികൾ ഉൾപ്പെടുത്തണം. അമിത മധുരമോ അന്നജമോ ഉള്ള ഭക്ഷണം കഴിക്കുന്നത് പൂർണ്ണ ഫലപ്രാപ്തിക്ക് ഉതകുന്നില്ല. മാഗ്നീഷ്യം, പൊട്ടാസ്യം, സോഡിയം തുടങ്ങിയ ഇലക്ട്രോ ലൈറ്റുകളുടെ അഭാവം ഉണ്ടാകാതിരിക്കാൻ പച്ചക്കറികൾ നിർബന്ധമായും ഉൾപ്പെടുത്തണം. മൾട്ടി വൈറ്റമിൻ, വൈറ്റമിൻ ബി കോംപ്ലക്സ് തുടങ്ങിയവ ആഴ്ചയിൽ മൂന്നു ദിവസമെങ്കിലും ഉൾപ്പെടുത്തണം. പരമാവധി പാർശ്വഫലങ്ങൾ കുറച്ചുകൊണ്ട് ഫാസ്റ്റിംഗ് ചെയ്യാൻ വേണ്ടിയാണ് ഇങ്ങനെ പറയുന്നത്

Keto-diet-intermittent-fasting-for-PCOS

Keto-diet-intermittent-fasting-for-PCOS

Keto with intermittent fasting helps to cure Polycystic ovarian syndrome: Low carb Food menu preparation for PCOS/PCOD

PCOS/PCOD പരിഹാരമാർഗങ്ങൾ

PCOS ഉള്ളവർക്ക് ഹോർമോൺ സംബന്ധമായ പ്രശ്നങ്ങൾ സാധാരണയാണ്, അങ്ങനെ ഉള്ളവർ ധാരാളം ഡയറ്റും മറ്റു വ്യായാമങ്ങളും പിന്തുടരുകയും  എന്നാൽ ശരീരഭാരം ആഗ്രഹിക്കുന്നതു  പോലെ കുറയാതിരിക്കുകയും ചെയ്യുന്നു. സാധാരണ സ്ത്രീകളെ അപേക്ഷിച്ച് PCOS ഉള്ള സ്ത്രീകൾക്ക് ശരീരഭാരം അത്ര വേഗത്തിൽ കുറയാറില്ല. കൃത്യമായി ആർത്തവം (Menstrual cycle) വരാതിരിക്കുക, അമിത രോമവളർച്ച, അമിതഭാരം, ഡിപ്രഷൻ, മുടികൊഴിച്ചിൽ, കഴുത്ത് ഇരുണ്ട നിറമാകുന്നത് , അമിതമായ മുഖക്കുരു, വന്ധ്യത ഇങ്ങനെ PCOS ഉള്ളവർ അനുഭവിക്കുന്ന ശാരീരിക ബുദ്ധിമുട്ടുകൾ വളരെയേറെയാണ്.  എന്നിരുന്നാലും നിലവിൽ  ബഹുഭൂരിപക്ഷം സ്ത്രീകളും ഏറ്റവും കൂടുതൽ ബുദ്ധിമുട്ടുന്നത് അമിതവണ്ണവും വന്ധ്യതയും  മൂലമാണ്. PCOS ന് നിലവിൽ  ശാശ്വത പരിഹാരമാർഗം കണ്ടുപിടിച്ചിട്ടില്ല. പലതരം ചികിത്സാ മാർഗങ്ങളും ഇന്ന് നിലവിലുണ്ടെങ്കിലും കൃത്യമായ ഡയറ്റിലൂടെയും വ്യായാമത്തിലൂടെയും PCOS നിങ്ങൾക്ക് നിയന്ത്രിക്കാം. PCOS മൂലം ബുദ്ധിമുട്ടുന്നവർക്ക് ഏറ്റവും കൂടുതൽ അനുയോജ്യമായ ഡയറ്റ് ലോ കാർബ് ഡയറ്റുകൾ തന്നെയാണ്. വിദഗ്ധരുടെ ഉപദേശത്തോടെ ഡയറ്റ് ചെയ്യുന്ന ഏതൊരാൾക്കും  PCOS പൂർണമായും  സുഖപ്പെടുത്താവുന്നതാണ്.

കീറ്റോ ഡയറ്റ് ചെയ്യുമ്പോൾ PCOS/ PCOD പൂർണ്ണമായും സുഖപ്പെടുമോ?

PCOS മൂലം അമിതവണ്ണവും  ഇൻസുലിൻ റെസിസ്റ്റൻസും ഉള്ള സ്ത്രീകളിൽ, ലോ കാർബ് ഡയറ്റുകൾ പരീക്ഷണം നടത്തപ്പെട്ടിട്ടുണ്ട്. അങ്ങനെ നടത്തപ്പെട്ട  പരീക്ഷണങ്ങളുടെ അടിസ്ഥാനത്തിൽ  ശരീരഭാരം, ടെസ്റ്റോസ്റ്റിറോൺ, ട്രൈഗ്ലിസറൈഡ്, ഫാസ്റ്റിംഗ് ഇൻസുലിൻ , ഗ്ലൂക്കോസ് തുടങ്ങിയവയുടെ ഗണ്യമായ കുറവ് ഉണ്ടായതായി കണ്ടെത്തിയിട്ടുണ്ട്. ഇന്നത്തെ തലമുറയിൽ  ഏറ്റവും സാധാരണയായി കണ്ടുവരുന്ന ഇത്തരം പ്രശ്നങ്ങൾക്ക് ലോ കാർബ് ഡയറ്റുകൾ വളരെ സഹായകരമാണ് എന്നത് തെളിയിക്കപ്പെട്ട സംഭവമാണ്. അമിതവണ്ണവും മുഖത്തും കൈകാലുകളിലും ഉണ്ടാകുന്ന അമിത രോമവളർച്ചയും മൂലം പല പെൺകുട്ടികൾക്കും ആത്മവിശ്വാസം നഷ്ടപ്പെടുന്നു. വന്ധ്യത കാരണം കുടുംബ ജീവിതത്തിലും പ്രശ്നങ്ങൾ ഉണ്ടാകുന്നു. ഇവ വ്യക്തിപരമായ പ്രശ്നങ്ങളിലേക്കും വിഷാദരോഗത്തിലേക്കും നയിക്കുന്നു. PCOS സുഖപ്പെടുത്തുന്ന പ്രത്യേക തെറാപ്പികളോ ചികിത്സകളോ നിലവിൽ ഇല്ലെങ്കിലും പ്രമേഹരോഗികൾക്ക് നൽകുന്ന മരുന്ന്  നൽകുന്നതുവഴി ക്രമംതെറ്റിയ മെറ്റബോളിസം , ഇൻസുലിൻ റസിസ്റ്റൻസ് തുടങ്ങിയവ മാത്രം അല്പം ആയി പരിഹരിക്കപ്പെടുന്നു.

എന്താണ് PCOS/ PCOD ? എങ്ങനെയാണ് PCOS/ PCOD അഥവാ പോളിസിസ്റ്റിക് ഓവേറിയൻ ഡിസീസ് ( പോളിസിസ്റ്റിക് ഓവേറിയൻ സിൻഡ്രം) ഉണ്ടാകുന്നത്.

PCOS വരുമ്പോൾ ആളുകൾ പലതരം ചികിത്സകൾ അതിന് വേണ്ടി സ്വീകരിക്കുന്നുണ്ട്. എന്നാൽ അതൊന്നും ശാശ്വത പരിഹാരം അല്ല . ഇതിൻറെ മൂലകാരണം എന്താണ് എന്ന് കണ്ടെത്തുകയാണ് വേണ്ടത്. ആ കാരണത്തിന് ആണ് നമ്മൾ ചികിത്സ നൽകേണ്ടത്. അതായത് രോഗത്തിൻറെ വേരിനെ ആണ് ഇല്ലാതാക്കേണ്ടത്. അതല്ലാതെ നൽകുന്ന ചികിത്സകളെല്ലാം എപ്പോഴും അനുയോജ്യമാകണമെന്നില്ല. അനേകായിരം ലക്ഷങ്ങൾ മുടക്കി വന്ധ്യതാ ചികിത്സ നടത്തുന്നവർക്കും  ഹോർമോണൽ സംബന്ധമായ പ്രശ്നങ്ങൾക്ക് ചികിത്സിക്കുന്നവർക്കും ഒരുപാട് ആശ്വാസം തരുന്ന ഒന്നാണ് കീറ്റോ ജെനിക് ഡയറ്റിലൂടെ പിസിഓഡി മാറുന്നത്. കീറ്റോ ഡയറ്റ് ചെയ്യുമ്പോൾ എപ്രകാരമാണ് പിസിഒഡി സുഖപ്പെടുന്നത് എന്ന് മനസ്സിലാകണമെങ്കിൽ എപ്രകാരമാണ് പിസിഒഡി രൂപപ്പെടുന്നത് എന്ന് മനസ്സിലാക്കണം.

സാധാരണയായി സ്ത്രീകൾക്ക് ഓരോ മാസവും തെറ്റാതെ നടക്കുന്ന ഒരു പ്രതിഭാസമാണ് ആർത്തവചക്രം (മാസമുറ) അഥവാ Menstrual cycle. സ്ത്രീകളുടെ  പ്രത്യുല്പാദന (Reproductive) അവയവങ്ങളായ Vagina (യോനി), യൂട്രസ് (ഗർഭാശയം), ഫലോ പിയൻ ട്യൂബുകൾ, ഓവറികൾ (അണ്ഡാശയങ്ങൾ) എന്നിവ ആണ് ഇതിൽ ഓവറിയിലാണ് പ്രത്യുൽപാദനത്തിന് വേണ്ടിയുള്ള എഗ്ഗ് അഥവാ മുട്ട ഉൽപാദിപ്പിക്കുന്നത്. അണ്ഡാശയത്തിന് ഉള്ളിൽ നിരവധി ഫോളിക്കിൾസ് ഉണ്ട് . വൃത്താകൃതിയിലുള്ള   ചെറിയ അറകളിലാണ് ഈ മുട്ട അഥവാ എഗ്ഗ് സ്ഥിതിചെയ്യുന്നത്.

ഓരോ മാസവും  തലച്ചോറിനു താഴെയുള്ള പിറ്റ്യൂട്ടറി ഗ്ലാൻഡിൽ ഉണ്ടാക്കുന്ന FSH അതായത് ഫോളിക്കിൾസ് സ്റ്റിമുലേറ്റിംഗ് ഹോർമോൺ , LH അതായത് ല്യൂട്ടിനൈസിംഗ് ഹോർമോൺ , എന്നീ ഹോർമോണുകൾ രക്തത്തിൽ എത്തി ഓവറിയിൽ ചെന്ന് മുട്ടകൾ (അണ്ഡം) പൂർണ്ണവളർച്ച എത്തുവാനായി സഹായിക്കുന്നു. പൂർണ്ണ വളർച്ച എത്തിയ ഈ എഗ്ഗ് ഫോളിക്കിൾസ് ഈ പറയുന്ന അറകളിൽ നിന്ന് ഈസ്ട്രോജൻ എന്നുപറയുന്ന ഫീമെയിൽ സെക്സ് ഹോർമോൺ (സ്ത്രീ ലൈംഗീക ഹോർമോൺ) ഉൽപാദിപ്പിക്കാൻ ആയി സഹായിക്കുന്നു. ഈസ്ട്രോജൻ രക്തത്തിൽ അതിൻറെ സന്തുലിതമായ അളവിൽ എത്തുമ്പോൾ പിറ്റ്യൂട്ടറി ഗ്ലാൻഡിൽ നിന്നും LH ഉൽപാദിപ്പിച്ച് ഓവറിക്ക് അകത്തുള്ള പൂർണ്ണവളർച്ചയെത്തിയ ഫോളിക്കിൾസിൽ നിന്നും എഗ്ഗ് പുറത്തേക്ക് എത്തുവാൻ സഹായിക്കുന്നു. ഇതിനെയാണ് ഓവുലേഷൻ (അണ്ഡവിക്ഷേപം) എന്ന് വിളിക്കുന്നത്.

പൂർണ്ണവളർച്ചയെത്തിയ ഒരു മുട്ട മാത്രം  ഫലോപിയൻ  ട്യൂബ് വഴി യൂട്രസിലേക്ക് പോകുന്നു. ബാക്കിയുള്ള എല്ലാ മുട്ടകളും അവിടെ തന്നെ അലിഞ്ഞു പോവുകയും ചെയ്യുന്നു. എന്നാൽ പോളിസിസ്റ്റിക് ഓവേറിയൻ സിൻഡ്രം ഉണ്ടാകാനുള്ള മൂലകാരണം ക്രമം തെറ്റി വരുന്ന LH ഹോർമോണിൻറെ പ്രവർത്തനമാണ്. Immature ആയിട്ടുള്ള അല്ലെങ്കിൽ പൂർണവളർച്ച എത്താത്ത Eggs അതായത് മുട്ടകൾ പിന്നീട് സിസ്റ്റ് ആയി കാലക്രമേണ രൂപാന്തരം പ്രാപിക്കുന്നു. ഇതിനെ ഒവേറിയൻ സിസ്റ്റ് (അണ്ഡാശയ മുഴകൾ) എന്നു വിളിക്കുന്നു.

ഇതിൻറെ മൂലമായ കാരണം എന്നറിയപ്പെടുന്നത് ഇൻസുലിൻ റസിസ്റ്റൻസ് ആണ് . പാൻക്രിയാസ് ഇൻസുലിൻ എന്നുപറയുന്ന ഹോർമോണിനെ അമിതമായി ഉൽപാദിപ്പിക്കുന്നതിലൂടെ LH എന്ന് പറയുന്ന ഹോർമോൺ അബ്നോർമൽ ആകുന്നു. ഇങ്ങനെ  അസന്തുലിതമായി  പ്രവർത്തിക്കുന്ന LH ഹോർമോണുകളും ഇൻസുലിൻ റസിസ്റ്റൻസിന്റെ ഭാഗമായി അമിതമായി ഉത്പാദിപ്പിക്കപ്പെടുന്ന ഇൻസുലിൻ ഹോർമോണുകളും രക്തത്തിലുള്ള ഗ്ലോബുലിൻ എന്നുപറയുന്ന ബൈൻഡിങ് പ്രോട്ടീന്റെ അളവിനെ കുറയ്ക്കുന്നു. രക്തത്തിലുള്ള ഗ്ലോബുലിൻ എന്നുപറയുന്ന  ബൈൻഡിങ് പ്രോട്ടീനാണ് ടെസ്റ്റോസ്റ്റിറോൺ എന്ന ഹോർമോണിനെ ക്രമീകരിക്കുന്നത്. രക്തത്തിൽ ഉയർന്ന അളവിൽ കാണുന്ന ടെസ്റ്റോസ്റ്റീറോണിനെ കൃത്യമായി ക്രമീകരിക്കുന്നത് ഗ്ലോബുലിൻ എന്ന് പറയുന്ന ഈ ബൈൻഡിങ് പ്രോട്ടീൻ ആണ് . ഇങ്ങനെ കൃത്യമായ അളവിൽ ഗ്ലോബുലിൻ ഇല്ലാത്തതിനാൽ ശരീരത്തിൽ അമിതമായി ടെസ്റ്റോസ്റ്റിറോണിന്റെ അളവ് കൂടുന്നു. ഇതിൻറെ ഭാഗമായി സ്ത്രീകളിൽ അമിതമായ മുഖക്കുരു,  കഴുത്തിനു ചുറ്റുമുള്ള കറുപ്പ്, മുഖത്തും കൈകാലുകളിലും അമിതമായ രോമവളർച്ച  തുടങ്ങിയവ ഉണ്ടാകാനുള്ള സാഹചര്യം ഉണ്ടാക്കുന്നു. ടെസ്റ്റോസ്റ്റിറോണിൻറെ അളവ് കൂടുന്നതു കൊണ്ടാണ് സ്ത്രീകളിൽ  ഇത്തരത്തിലുള്ള മുടിയും താടിയും മീശയും എല്ലാം വളരുന്നത്. പോളിസിസ്റ്റിക് ഓവേറിയൻ സിൻഡ്രം എന്ന് പറയുന്ന ഈ ഒരു അസുഖത്തിന്റെ യഥാർത്ഥ മൂല കാരണം എന്ന് അറിയപ്പെടുന്നത് ഇൻസുലിൻ റസിസ്റ്റൻസ് ആണ് .

നമ്മൾ ചികിത്സ കൊടുക്കേണ്ടതും ഇൻസുലിൻ റസിസ്റ്റൻസിനു വേണ്ടിയാണ്. ഇതിന് ഏറ്റവും നല്ല പരിഹാരമാർഗം എന്നു പറയുന്നത് നല്ല ഒരു ഡയറ്റ് ആണ് . അതായത്  ലോ കാർബ് ഡയറ്റ്, കീറ്റോജെനിക് ഡയറ്റ്, ഇൻറർമിറ്റൻഡ് ഫാസ്റ്റിംഗ് പാറ്റേണുകൾ തുടങ്ങിയവ. ഇത്തരം ഡയറ്റുകളും ഫാസ്റ്റിംഗ് പാറ്റേണുകളും ഇൻസുലിൻ റസിസ്റ്റൻസിനെ കൃത്യമായി ക്രമീകരിക്കുന്നു. അങ്ങനെ ഹോർമോൺ ഉൽപ്പാദനത്തെ സന്തുലിതാവസ്ഥയിൽ എത്തിക്കുന്നു. അതുകൊണ്ടാണ് ഇത്തരം ഡയറ്റ് എടുക്കുന്നവർ ചികിത്സ കൂടാതെ തന്നെ സുഖം പ്രാപിക്കുന്നത്.

നിരാശയല്ല മനഃസാന്നിധ്യമാണ് പ്രധാനം.

കുറച്ചുനാൾ മുൻപുവരെ അപൂർവ്വം ചിലരിൽ മാത്രമായി ഒതുങ്ങിനിന്നിരുന്ന ഒരു രോഗമായിരുന്നു പിസിഒഡി . പിന്നീട് ജീവിതശൈലി കൊണ്ടോ  പുതിയ തലമുറയുടെ ഭക്ഷണരീതി കൊണ്ടോ അത് ക്രമാതീതമായി വർദ്ധിച്ചു. ബഹുഭൂരിപക്ഷം സ്ത്രീകളും പെൺകുട്ടികളും ഇന്ന് പിസിഒടിയുടെ  ബുദ്ധിമുട്ട് അനുഭവിക്കുന്നു. 15 നും 25 നും ഇടയിൽ പ്രായമുള്ള മിക്കവാറും പെൺകുട്ടികളിൽ ഇത് പടർന്നു പിടിച്ചിരിക്കുന്നു. ഇതിൻറെ പ്രധാനകാരണം അവരുടെ ഭക്ഷണക്രമങ്ങൾ തന്നെയാണ്. പ്രമേഹരോഗികളായ അമ്മമാർ ഉണ്ടെങ്കിൽ അവരുടെ പെൺമക്കൾക്ക് പിസിഒഡി വരാനുള്ള സാധ്യതയും കൂടുതലാണ് എന്ന് പഠനങ്ങൾ തെളിയിക്കുന്നു.

ഇന്നത്തെ തലമുറയുടെ ഇഷ്ടഭക്ഷണം ബേക്കറി പലഹാരങ്ങളും പ്രോസസ് ചെയ്ത ആഹാരങ്ങളും പുറത്തുനിന്നുള്ള ഭക്ഷണശീലങ്ങളും അമിത മധുരമുള്ള മധുരപലഹാരങ്ങളും ചോക്ലേറ്റുകളും കേക്കുകളും ബിസ്ക്കറ്റുകളും ഐസ്ക്രീമുകളും മറ്റും ഒക്കെയാണ്.  ഉയർന്ന അളവിൽ കാർബോഹൈഡ്രേറ്റും  മധുരവും ഉപ്പും അടങ്ങിയ ഭക്ഷണമാണ് ഇന്നത്തെ തലമുറയുടെ രുചി. ഇത്തരം താളംതെറ്റിയ ഭക്ഷണരീതികൾ മൂലം സ്ത്രീകൾ നേരിടുന്ന പ്രധാന വെല്ലുവിളിയാണ് വന്ധ്യത , ക്രമം തെറ്റിയ ആർത്തവ ചക്രം തുടങ്ങിയവ. പരിശോധന നടത്തുമ്പോൾ ഇതെല്ലാം ചെന്നെത്തുന്നത് പിസിഒഡി എന്ന പ്രശ്നത്തിലാണ്. ഇതിന് ഏറ്റവും നല്ല   പരിഹാരം ഭക്ഷണരീതിയിൽ മാറ്റം വരുത്തുക എന്ന് തന്നെയാണ്. കാരണം ഭക്ഷണ രീതിയിൽ നിന്നാണ് ഈ അസുഖം പുതിയ തലമുറയിലെ പെൺകുട്ടികളിൽ പടർന്നുപിടിച്ചത്.

കുറച്ചു വർഷങ്ങൾക്കു മുൻപ്  അപൂർവ്വം ചിലരിൽ മാത്രം  കണ്ടിരുന്ന ഒന്നായിരുന്നു പിസിഒഡി. വീട്ടിലുണ്ടാക്കുന്ന ആരോഗ്യകരമായ ഭക്ഷണം കഴിച്ചും ശുദ്ധമായ ജലം കുടിച്ചും വളർന്ന പഴയ തലമുറയ്ക്ക്  ഇത്തരം പ്രശ്നങ്ങൾ ഉണ്ടായിരുന്നില്ല. ഉയർന്ന അളവിലുള്ള കാർബോഹൈഡ്രേറ്റും മധുരവും ഒഴിവാക്കിയാൽ തന്നെ  ഇതിന് ശാശ്വത പരിഹാരം കാണാൻ കഴിയും. കൃത്യമായി മാസമുറ അതായത് ആർത്തവം വരാത്ത സ്ത്രീകൾ കാർബോഹൈഡ്രേറ്റും മധുരവും കുറയ്ക്കുകയും ചെറിയ വ്യായാമമുറകൾ പിന്തുടരുകയും ചെയ്യുമ്പോൾ തന്നെ അവർക്ക് ആർത്തവചക്രം കൃത്യം ആകുന്നു. മൂന്നു മുതൽ ആറു മാസം വരെ ലോ കാർബ് ഡയറ്റുകൾ ചെയ്താൽ പിസിഒഡി കൃത്യമായി സുഖപ്പെടുത്താം. ഗർഭാശയ മുഴകൾ മൂലം ബുദ്ധിമുട്ട് അനുഭവിക്കുന്നവർക്കും ഇത്തരം ഡയറ്റുകൾ ആശ്വാസ പ്രദമാണ്. കീറ്റോജെനിക് ഡയറ്റ് ചെയ്തതിനുശേഷം പിസിഓഡി മാറിയവരും  ഗർഭാശയമുഴകളിൽ മാറ്റം വന്നവരും  ഏറെയാണ്.

വർഷങ്ങളായി കുഞ്ഞുങ്ങൾ ഇല്ലാതിരുന്നവരും അനേക ലക്ഷങ്ങൾ മുടക്കി വന്ധ്യതയ്ക്ക് ചികിത്സ തേടിയിരുന്നവരും കീറ്റോജെനിക് ഡയറ്റ് മൂന്നു മുതൽ ആറു മാസം വരെ കൃത്യമായി ചെയ്തു ഗർഭംധരിച്ചവരുണ്ട്. കീറ്റോജെനിക് ഡയറ്റിൽ ഏറ്റവും പ്രയോജനകരമായി മെച്ചപ്പെട്ട ചികിത്സ കിട്ടുന്ന  ഒന്നാണ് പിസിഓഡി . വന്ധ്യതയുടെ  പ്രധാന കാരണം  പിസിഒഡി തന്നെയാണ്. ഗർഭധാരണ സാധ്യതയുള്ള പ്രായത്തിലുള്ള 20 ശതമാനം സ്ത്രീകളിൽ പിസിഓഡി ഉള്ളതായി കണക്കാക്കപ്പെടുന്നു. പിസിഓഡി ഉള്ള സ്ത്രീകളിൽ 40 ശതമാനം പേർ വന്ധ്യത ഉള്ളവരാണ്. വന്ധ്യതാ ക്ലിനിക്കുകൾ സന്ദർശിക്കുന്ന അണ്ഡോല്പാദനം നടക്കാത്ത സ്ത്രീകളിൽ 95% പേർക്കും പിസിഒഡി ഉണ്ട് .

കീറ്റോജെനിക് ഡയറ്റ് പിന്തുടർന്നാൽ  ആദ്യമാസം തന്നെ  കാര്യമായ മാറ്റങ്ങൾ വന്നു തുടങ്ങും. ശരീരഭാരം കുറയുക, മുഖക്കുരുവിൽ ഉണ്ടാകുന്ന മാറ്റങ്ങൾ, മരുന്നു കഴിക്കാതെ തന്നെ ആർത്തവം ഉണ്ടാകുക തുടങ്ങിയവ. അതായത് അണ്ഡോല്പാദനം സ്വയം പുനരാരംഭിക്കുന്നു. ലോ കാർബ് ഡയറ്റുകൾ ഇൻസുലിൻ ഉത്പാദനം കുറയ്ക്കുകയും അതിലൂടെ ഇൻസുലിന്റെ പ്രവർത്തനക്ഷമത വർദ്ധിപ്പിക്കുകയും ചെയ്യുന്നു. പിസിഓഡി ഉള്ള എല്ലാ സ്ത്രീകളും അമിതഭാരം ഉള്ളവർ ആയിരിക്കണമെന്നില്ല. അതേപോലെ അമിതവണ്ണമുള്ള സ്ത്രീകൾക്കെല്ലാം പിസിഒഡി ഉണ്ടാകണമെന്നും ഇല്ല . എന്നാൽ ഇരുകൂട്ടർക്കും കീറ്റോജെനിക് ഡയറ്റ് വളരെ പ്രയോജനകരമാണ്. മരുന്നുകളിലൂടെ എല്ലാറ്റിനും പരിഹാരം കാണുന്ന നമുക്ക് പ്രകൃതിദത്തമായ ഭക്ഷണത്തിലൂടെ ആരോഗ്യം നിലനിർത്തുകയും വർധിപ്പിക്കുകയും  ചെയ്യാം.

Keto diet cheat meals

Keto diet cheat meals

LCHF Keto diet cheat meal remedies: How to reach ketosis after a cheat meal

കീറ്റോ ഡയറ്റ് തെറ്റിച്ചാൽ എന്തൊക്കെയാണ് ചെയ്യേണ്ടത് ? ഡയറ്റിൽ ഉൾപ്പെടാത്ത ഭക്ഷണം കഴിച്ചാൽ എന്താണ് പ്രതിവിധി ?

കീറ്റോ ഡയറ്റ് ചെയ്യുന്നവരുടെ ഒരു പ്രധാന വെല്ലുവിളിയാണ് കീറ്റോസിസ് നിലനിർത്തുക എന്നത് . മറ്റു ഡയറ്റുകൾ പോലെ അല്ല കീറ്റോ ഡയറ്റ്. അത് ഒരു മെറ്റബോളിക് ഡയറ്റ് ആണെന്ന് മാത്രമല്ല, ശരീരത്തിന്റെ പല രോഗാവസ്ഥകളെയും കുറവുകളേയും ശുദ്ധീകരിക്കുകയും പുനഃസ്ഥാപിക്കുകയും ചെയുന്ന ഡയറ്റ് ആണ്. അതുകൊണ്ടു തന്നെ മറ്റു ഡയറ്റുകളിൽ ചെയുന്നത് പോലെ ഇടയ്ക്കിടെ ഉള്ള ചീറ്റ് മീൽ എന്ന ഒരു അവസരം ഇത്തരം ലോ കാർബ്‌ ഡയറ്റുകളിൽ ഇല്ല. അത് തന്നെയാണ് ഈ ഡയറ്റ് പിന്തുടരുന്നതിൽ നിന്ന് പലരെയും നിരുത്സാഹപ്പെടുത്തുന്നതും. എന്നാൽ ജീവിതകാലം മുഴുവൻ ചില രോഗങ്ങൾക്ക് മരുന്ന് കഴിച്ചു മടുത്ത ആളുകൾക്ക് ഇത്തരം ഡയറ്റ് ഒരു അനുഗ്രഹം തന്നെയാണ്. എന്നിരുന്നാലും നല്ല ഒരു റിസൾട്ട് ലഭിക്കാൻ കഠിനാദ്ധ്വാനം ആവശ്യമാണ്. ഡയറ്റിൽ ഉൾപ്പെടാത്ത എന്തെങ്കിലും ഒരു ഭക്ഷണം കഴിച്ചു കഴിഞ്ഞാൽ ഡയറ്റിൽ നിന്നും പുറത്താകാനുള്ള സാധ്യത വളരെ കൂടുതലാണ്. കീറ്റോസിസ് എന്ന് പറയുന്നത് വളരെ സെൻസിറ്റീവായ ഒരു മെറ്റാബോളിസം ആണ് . സാധാരണ മെറ്റബോളിസത്തിൽ നിന്ന് കീറ്റോസിസ് എന്ന മെറ്റബോളിസത്തിലേക്ക് എത്താൻ കുറഞ്ഞത് രണ്ടാഴ്ചയെങ്കിലും എടുക്കും. അതേസമയം കീറ്റോസിസ് മെറ്റബോളിസത്തിൽ നിന്ന് സാധാരണ മെറ്റബോളിസത്തിലേക്ക് മാറാൻ അരമണിക്കൂറോ ഒരു മണിക്കൂറോ മതിയാകും. എന്തെങ്കിലും ഒരു ചീറ്റ് മീൽ കഴിച്ചാൽ ഇത് സംഭവിക്കും. ഇത്രയും സെൻസിറ്റീവായ ഒരു മെറ്റബോളിസത്തെ സംരക്ഷിക്കാൻ അല്ലെങ്കിൽ നിലനിർത്താൻ എന്തെല്ലാം കാര്യങ്ങളാണ് ശ്രദ്ധിക്കേണ്ടത് ?

ലോ കാർബ് ഡയറ്റ് എടുക്കുമ്പോൾ കൂടുതൽ കൊഴുപ്പുള്ള ഭക്ഷണങ്ങൾ കഴിക്കുക എന്നതാണ് നമ്മൾ ആദ്യം തന്നെ ശ്രദ്ധിക്കേണ്ട കാര്യം. അശ്രദ്ധ മൂലം ഉയർന്ന കാർബോഹൈഡ്രേറ്റ് ഉള്ള ഭക്ഷണങ്ങൾ കഴിച്ചിട്ടുണ്ടെങ്കിൽ അത് പൂർണമായും ഒഴിവാക്കുക. ചീറ്റ് മീൽ കഴിച്ചാൽ രണ്ടുദിവസം തുടർച്ചയായി ഇൻറർമിറ്റന്റ് ഫാസ്റ്റിംഗ് പിന്തുടരേണ്ടത് ആവശ്യമാണ്. ഇൻറർമിറ്റന്റ് ഫാസ്റ്റിംഗിൽ തന്നെ 16 മുതൽ 24 വരെയുള്ള മണിക്കൂർ വ്യത്യാസത്തിൽ ഫാസ്റ്റിംഗ് പാറ്റേണുകൾ ഉണ്ട് . ഇതിൽ ഏതാണോ നിങ്ങൾക്ക് ചെയ്യാൻ എളുപ്പം അതാണ് പിന്തുടരേണ്ടത്. അടുത്തതായി ശ്രദ്ധിക്കേണ്ടത് കുറച്ചു കൂടുതൽ സമയം എക്സർസൈസ് അഥവാ വ്യായാമം ചെയ്യുന്നതിൽ ശ്രദ്ധ ചെലുത്തണം. 30 മിനിറ്റ് മുതൽ ഒരു മണിക്കൂർ വരെ തുടർച്ചയായി എന്തെങ്കിലും ഒരു എക്സർസൈസിൽ ഫോക്കസ് ചെയ്യേണ്ടതാണ്. കീറ്റോസിസ് എന്ന പ്രോസസ്സിനെ നിലനിർത്താനും സംരക്ഷിക്കാനും ആയി ഒരാഴ്ചയെങ്കിലും ഇതു തുടരണം.

MCT ഓയിൽ അഥവാ മീഡിയം ചെയിൻ ട്രൈഗ്ലിസറൈഡ് ഓയിലുകൾ കീറ്റോൺസിന്റെ ഉൽപാദനം വർദ്ധിപ്പിക്കുവാനായി ഉപയോഗിക്കണം. MCT ഓയിലിന് ഏറ്റവും മികച്ച ഉദാഹരണമാണ് നമ്മുടെ വെളിച്ചെണ്ണ. വെളിച്ചെണ്ണ ധാരാളമായി നമ്മുടെ ഡയറ്റിൽ ഉൾപ്പെടുത്തിയാൽ കീറ്റോൺസിന്റെ ഉൽപാദനം വർദ്ധിക്കാൻ ഇടയാകും. അങ്ങനെ കീറ്റോസിസ് എന്ന പ്രക്രിയയുടെ സംരക്ഷണത്തിന് വെളിച്ചെണ്ണ പ്രധാന പങ്കുവഹിക്കുന്നു. മുകളിൽ പറഞ്ഞ കാര്യങ്ങൾ എല്ലാം നിങ്ങൾ കൃത്യമായി ചെയ്യണം. ചീറ്റ് മീൽ എടുക്കുന്ന ദിവസം നിർബന്ധമായും ആപ്പിൾ സൈഡർ വിനാഗിർ (ACV ) കുടിച്ചിരിക്കണം. അധികമായി കഴിച്ച കാർബോഹൈഡ്രേറ്റിന്റെ ദഹനത്തെ ഇത് നിയന്ത്രിക്കുന്നു.

അമിത അന്നജം ഉള്ള ഭക്ഷണം കഴിക്കുമ്പോൾ മാത്രമല്ല ചീറ്റ് മീൽ ആകുന്നത്. പ്രോട്ടീന്റെ അളവ് കൂടുമ്പോഴും ചീറ്റ് മീൽ ആകും. അധിക അളവിലുള്ള പ്രോട്ടീനെ ലിവർ കാർബോഹൈഡ്രേറ്റ് ആയി മാറ്റുന്നു. നല്ല രീതിയിൽ മെറ്റബോളിക് സ്ട്രെങ്ത് ഉള്ള ആളുകൾ ആണെങ്കിൽ 36 മണിക്കൂർ വാട്ടർ ഫാസ്റ്റിംഗ് ചെയ്താൽ തന്നെ അവർ തിരിച്ചു കീറ്റോസിസിലെത്തും. ഇങ്ങനെ വാട്ടർ ഫാസ്റ്റിംഗ് എടുക്കുമ്പോൾ ഫാസ്റ്റിംഗ് സമയത്ത് യാതൊരു തരത്തിലുമുള്ള കാലറി ഡ്രിങ്കുകൾ കുടിക്കാൻ പാടുള്ളതല്ല. വാട്ടർ ഫാസ്റ്റിംഗ് ചെയ്യാൻ ബുദ്ധിമുട്ട് ഉള്ളവർക്ക് ലിക്വിഡ് ഫാസ്റ്റിംഗ് ചെയ്യാവുന്നതാണ്. ലിക്വിഡ് ഫാസ്റ്റിംഗിൽ 36 മണിക്കൂറിനുള്ളിൽ ഗ്രീൻ ടീ ,ബട്ടർ കോഫി, ബുള്ളറ്റ് പ്രൂഫ് കോഫി, ബ്ലാക്ക് കോഫി, ബ്ലാക്ക് ടീ, മധുരമില്ലാത്ത ബദാം മിൽക്ക് തുടങ്ങിയവ കുടിക്കാം. ഇങ്ങനെ ചെയ്താൽ വേഗം കീറ്റോസിസിൽ തിരിച്ചെത്താൻ സാധിക്കും . എങ്കിലും ചെയ്യുന്ന ആളുകളുടെ പ്രായം നമ്മൾ പരിഗണിക്കേണ്ടതാണ്. 30 വയസ്സിൽ താഴെയുള്ളവർക്ക് മെറ്റബോളിക് സ്ട്രെങ്ത് കൂടുതലായിരിക്കും. അതുകൊണ്ടുതന്നെ അവർ ഒരു ലിക്വിഡ് ഫാസ്റ്റിംഗോ അല്ലെങ്കിൽ വാട്ടർ ഫാസ്റ്റിംഗിനോ ശേഷം കീറ്റോസിസിൽ തിരിച്ചെത്തുന്നത് വേഗത്തിൽ ആയിരിക്കാം. യഥാർത്ഥത്തിൽ കീറ്റോ ഡയറ്റിൽ ചീറ്റ് മീൽ എന്നൊന്നില്ല. കീറ്റോജെനിക് ഡയറ്റിൽ കീറ്റോസിസ് എന്ന ആരോഗ്യകരമായ മെറ്റബോളിസം നഷ്ടപ്പെടും എന്നുള്ളതുകൊണ്ട് തന്നെ ഡയറ്റിൽ ഉൾപ്പെടാത്ത ഭക്ഷണങ്ങൾ കഴിക്കാതിരിക്കുക യാണ് വേണ്ടത്. കീറ്റോ കാൽക്കുലേറ്റർ ഉപയോഗിച്ചുകൊണ്ട് ഒരാളുടെ ശരീരത്തിൻറെ ഭാരത്തിനും ഉയരത്തിനും പ്രായത്തിനും അനുസൃതമായി മാക്രോ പ്രൊപോഷൻ (ഒരു ദിവസം കഴിക്കേണ്ട ഭക്ഷണങ്ങളുടെ അളവ്) ഗണിക്കേണ്ടതുണ്ട്. ആ അളവ് അനുസരിച്ച് കൃത്യമായി കാർബോഹൈഡ്രേറ്റും പ്രോട്ടീനും ഫാറ്റും കഴിക്കുമ്പോഴാണ് കീറ്റോജെനിക് എന്ന പ്രക്രിയയിലേക്ക് ശരീരം വേഗത്തിൽ എത്തുന്നത്. സ്വന്തമായി ഡയറ്റ് ചെയ്യുന്നവർക്ക് ഈ അളവ് കൃത്യമായി ലഭിക്കണമെന്നില്ല. പരിശീലനം ലഭിച്ച ഒരു പ്രൊഫഷണൽ ഗൈഡൻസ് ഇതിന് ആവശ്യമാണ്. കീറ്റോസിസിൽ തിരിച്ചെത്താൻ അവരുടെ മെറ്റബോളിസവും പ്രായവും എല്ലാം പരിഗണിക്കേണ്ടതുണ്ട്. കഴിച്ചുപോയ ചീറ്റ് മീലിന്റെ അളവ് നോക്കിയിട്ട് വേണം പരിഹാരമാർഗ്ഗങ്ങളിലേക്ക് കടക്കാൻ . ഒരു ചെറിയ കഷണം ചോക്ലേറ്റ് അല്ലെങ്കിൽ ലഡ്ഡു അങ്ങനെ എന്തെങ്കിലും കഴിച്ചാൽ പൂർണമായും കീറ്റോസിസ് എന്ന മെറ്റബോളിസത്തിൽനിന്ന് ഒഴിവാക്കപ്പെടണം എന്നില്ല. ഇവിടെയാണ് മെറ്റബോളിക് സ്ട്രെങ്ത്തിൻറെ ആവശ്യം. നല്ല രീതിയിൽ കൃത്യമായി ഡയറ്റ് പിന്തുടരുന്ന ഒരാൾ ഒരു ചെറിയ ചീറ്റ് മീൽ കൊണ്ട് ഉടനെതന്നെ ഡയറ്റിൽ നിന്ന് പുറത്താകണം എന്നില്ല. മെറ്റബോളിക് സ്ട്രെങ്ത് കുറവുള്ളവർ ചിലപ്പോൾ പുറത്തായേക്കാം. ഒരുപക്ഷേ കൂടുതൽ നാൾ ഡയറ്റ് പിന്തുടർന്നവർ എളുപ്പത്തിൽ പുറത്താകുകയും ഇല്ല . എന്തായാലും ചെറുതാണെങ്കിലും ചീറ്റ് മീൽ എന്നൊന്നു സംഭവിച്ചു കഴിഞ്ഞാൽ നമുക്ക് ഏറ്റവും അടുത്ത പ്രതിവിധി തൊട്ടടുത്ത നേരത്തെ ഭക്ഷണം ഉപേക്ഷിക്കുക എന്നതാണ്.

അടുത്തതായി അറിഞ്ഞോ അറിയാതെയോ ബിരിയാണി അല്ലെങ്കിൽ സദ്യ പോലെ ഉയർന്ന അളവിലുള്ള ചീറ്റിംഗ് എടുക്കുന്നവരെ കുറിച്ചുള്ളതാണ്. മറ്റൊരു അവസരം എന്നുപറയുന്നത് ഇടവിട്ടുള്ള ഉപവാസം അഥവാ ഇൻറർമിറ്റന്റ് ഫാസ്റ്റിംഗ് ആണ് . 16 മുതൽ 18 മണിക്കൂർ വരെയുള്ള ഫാസ്റ്റിംഗ് തുടർച്ചയായി ഒരു ആഴ്ച ചെയ്യണം. ഫാസ്റ്റിംഗ് സമയത്ത് വെള്ളം മാത്രം കുടിച്ചു കൊണ്ട് വേണം ഡയറ്റ് ചെയ്യാൻ . 20 മണിക്കൂർവരെ ഫാസ്റ്റിംഗ് ചെയ്യാവുന്നതാണ്. അത് ഓരോരുത്തരുടെയും കഴിവും മനഃസാന്നിധ്യവും അനുസരിച്ച് ചെയ്താൽ മതിയാകും. ഫാസ്റ്റിംഗ് സമയത്താണ് വ്യായാമം ചെയ്യേണ്ടത്. ഭക്ഷണം കഴിച്ചതിനുശേഷം എക്സർസൈസ് ചെയ്യരുത്. ഫാസ്റ്റിംഗ് അവസാനിപ്പിക്കുന്നതിന് കുറച്ചു മുൻപായി വ്യായാമം ചെയ്താൽ അത് കൂടുതൽ കലോറി എരിച്ചു കളയാൻ കാരണമാകും. ഇങ്ങനെ ചെയ്യുന്നത് കുടവയർ കുറയാൻ സഹായിക്കും.

ആപ്പിൾ സൈഡർ വിനാഗിരി (ACV) രണ്ട് ടീസ്പൂൺ, ഒരു നാരങ്ങയുടെ പകുതി, ആവശ്യത്തിന് ഹിമാലയൻ പിങ്ക് സാൾട് അഥവാ ഇന്തുപ്പ് , എന്നിവ ഒരു ഗ്ലാസ് വെള്ളത്തിൽ നന്നായി നേർപ്പിച്ചതിനുശേഷം ഒരു സ്ട്രോ ഉപയോഗിച്ച് ഉറങ്ങുന്നതിനു മുൻപ് കുടിക്കാവുന്നതാണ്. ആപ്പിൾ സൈഡർ വിനാഗിരി (ACV) എന്നത് ഒരു വീര്യം കുറഞ്ഞ ആസിഡ് ആണ് ,അത് പല്ലുകളിൽ സ്പർശിക്കുന്നത് നല്ലതല്ല. സ്ട്രോ ഉപയോഗിച്ച് കുടിക്കാൻ സാധിക്കാത്തവർക്ക് നേരിട്ട് കുടിക്കാവുന്നതാണ്. എന്നാൽ കുടിച്ചു കഴിഞ്ഞ ഉടനെ വായ നന്നായി കഴുകി വൃത്തിയാക്കണം അല്ലെങ്കിൽ ബ്രഷ് ചെയ്യണം. അധികം വരുന്ന കാർബോഹൈഡ്രേറ്റിനെ ദഹിപ്പിക്കാൻ ആപ്പിൾ സൈഡർ വിനാഗിരിക്കു കഴിയും. യൂറിക് ആസിഡ് അളവ് നിയന്ത്രിക്കാനും ഈ മിശ്രിതം സഹായിക്കും.

ഫാസ്റ്റിംഗ് സമയത്ത് പലരും ഉപ്പിട്ട നാരങ്ങാവെള്ളം, കട്ടൻ ചായ,കട്ടൻകാപ്പി, ഗ്രീൻ ടീ തുടങ്ങിയവ ഉൾപ്പെടുത്താറുണ്ട്. ഏറ്റവും പൂർണമായ ഒരു ഫലം ലഭിക്കാൻ ഫാസ്റ്റിംഗ് സമയത്ത് വെള്ളം മാത്രം കുടിക്കുക. വെള്ളം കുടിക്കുമ്പോൾ രണ്ടോ മൂന്നോ ലിറ്റർ കുടിച്ചാൽ മതിയാകും. ദാഹത്തിന് അനുസരിച്ചാണ് വെള്ളം കുടിക്കേണ്ടത്. ധാരാളം വെള്ളം കുടിക്കുന്നത് കൊണ്ട് ശരീരത്തിലെ അമിത കൊഴുപ്പ് ഉരുകി പോവുകയില്ല. വെള്ളം ഒരിക്കലും കൊഴുപ്പിനെ ദഹിപ്പിക്കുന്നില്ല. നമുക്ക് അറിയാവുന്നതുപോലെ വെള്ളത്തിൽ വെളിച്ചെണ്ണ ചേർത്താൽ അതൊരിക്കലും ലയിച്ചു യോജിക്കാറില്ല. വെളിച്ചെണ്ണ വേർതിരിഞ്ഞു തന്നെ നിൽക്കും.അതുപോലെതന്നെ വെള്ളം കുടിക്കുന്നത് കൊണ്ട് തടി കുറയാനോ കൊഴുപ്പ് ഉരുകാനോ സാധ്യതയില്ല. അത് തികച്ചും തെറ്റായ ഒരു പ്രചാരണമാണ്. വെള്ളം കുടിക്കുന്നത് ശരീരത്തിലെ മറ്റു പല ആവശ്യങ്ങൾക്കും ഉപാപചയപ്രവർത്തനങ്ങൾ കൃത്യമായി നടക്കുന്നതിനും വേണ്ടിയാണ്. അമിതമായ വെള്ളം നമ്മുടെ ശരീരത്തിന് ആവശ്യമില്ല. ശരീരത്തിൻറെ ഉയരത്തിനും ഭാരത്തിനും അനുസരിച്ച് മാത്രം വെള്ളം കുടിക്കുക. ഇന്റർമിറ്റന്റ് ഫാസ്റ്റിംഗ് എടുക്കുന്നവർ അഞ്ചോ ആറോ ലിറ്റർ വെള്ളം കുടിക്കുന്നത് ആയി പറയുന്നു. ഒരിക്കലും അതിൻറെ ആവശ്യമില്ല.

ചീറ്റ് മീൽ എടുത്തതിനുശേഷം ഒരാഴ്ച ഫാസ്റ്റിംഗ് എടുക്കുന്നവർ ഭക്ഷണത്തിൽ കൂടുതൽ കൊഴുപ്പ് ഉൾപ്പെടുത്താൻ ശ്രമിക്കണം. 5 വാൾനട്സ് 5 ബദാം, ബട്ടർ ഫ്രൂട് അതായത് അവോക്കാഡോ, Egg Yolk അഥവാ മുട്ടയുടെ മഞ്ഞക്കരു, 50 ഗ്രാം വെണ്ണ തുടങ്ങിയവ ഉൾപ്പെടുത്താം. പ്രോട്ടീൻ സ്രോതസിനു വേണ്ടി ഇറച്ചിയോ മീനോ ഉൾപ്പെടുത്തുമ്പോൾ deep oil ഫ്രൈ അഥവാ എണ്ണയിൽ മുക്കി പൊരിച്ചെടുക്കുന്ന രീതിയിൽ പാകം ചെയ്ത് എടുക്കേണ്ടതാണ്. സാലഡുകൾ കഴിക്കുമ്പോൾ നിർബന്ധമായും എക്സ്ട്രാ വിർജിൻ ഒലിവ് ഓയിൽ ചേർക്കുക. ബോൺ ബ്രോത് അഥവാ സൂപ്പുകൾ കുടിക്കാവുന്നതാണ്. ചീറ്റ് മീൽ എടുത്ത് കഴിഞ്ഞു തിരിച്ചു ഡയറ്റിലേക്ക് വരുമ്പോൾ ആദ്യത്തെ 7 ദിവസം വൈറ്റമിൻ ബി കോമ്പ്ലെക്സ് ഗുളിക കഴിക്കുന്നത് നല്ലതാണ്. സാധാരണ കീറ്റോജെനിക് ഡയറ്റിൽ 20 മുതൽ 50 ഗ്രാം വരെ കാർബോഹൈഡ്രേറ്റ് ആളുകൾ പൊതുവേ കഴിക്കാറുണ്ട്. എന്നാൽ ചീറ്റ് മീൽ എടുത്തതിനുശേഷം 5 ഗ്രാം മുതൽ 10 ഗ്രാമിനുള്ളിൽ കൃത്യമായി കാർബോഹൈഡ്രേറ്റിന്റെ അളവ് ശ്രദ്ധിക്കണം. ഈ 10 ഗ്രാമിൽ ഉൾപ്പെടുന്ന കാർബോ ഹൈഡ്രേറ്റ് ഇലക്കറികളിൽ നിന്ന് ലഭ്യമാക്കണം. ബാക്കി മത്സ്യമാംസ ഭക്ഷണങ്ങളിൽ നിന്നും മുട്ട വെളിച്ചെണ്ണ ബട്ടർ നെയ്യ് ഒലിവെണ്ണ തുടങ്ങിയവ ഉൾപ്പെടുത്താം. പച്ചക്കറികളിൽ നിന്ന് അല്ലാതെ കാർബോഹൈഡ്രേറ്റ് ഈ ഒരു കാലയളവിൽ ഉൾപ്പെടുത്താൻ പാടില്ല. കാർബോഹൈഡ്രേറ്റ് കൂടുതലുള്ള അണ്ടി വർഗ്ഗങ്ങളും ഒഴിവാക്കണം. ഇത്തരം കാര്യങ്ങൾ പറയുമ്പോഴും ചീറ്റ് മീൽ എന്നത് അവസാന അവസരം മാത്രമായിരിക്കണം.

അടുത്തതായി സുഖകരമായ ഉറക്കം അത്യാവശ്യമാണ്. എട്ടു മണിക്കൂറെങ്കിലും ഒരുദിവസം ഉറങ്ങാൻ ശ്രമിക്കണം. ഉറങ്ങുന്നത് വഴി സ്ട്രെസ് അഥവാ മാനസിക പിരിമുറുക്കം കുറയുകയും അങ്ങനെ കോർട്ടിസോളിന്റെ അളവ് കുറയുകയും ചെയ്യുന്നു. അതുമൂലം മെറ്റബോളിസം വർദ്ധിക്കുകയും പെട്ടെന്ന് കീറ്റോസിസിൽ എത്താൻ സഹായിക്കുകയും ചെയ്യുന്നു. മുകളിൽ പറഞ്ഞ കാര്യങ്ങളെല്ലാം ചീറ്റ് മീൽ എടുത്തവർക്കും ശരീരഭാരം കുറയുന്നത് സ്റ്റക്ക് ആയവർക്കും പിന്തുടരാവുന്ന കാര്യങ്ങളാണ്. ഡയറ്റ് എടുക്കുന്ന എല്ലാവർക്കും ഈ കാര്യങ്ങൾ പിന്തുടരാവുന്നതാണ്.

Keto diet cholesterol value

Keto diet cholesterol value

What happens to your LDL cholesterol when you go on an LCHF Keto diet: How to control the high cholesterol levels in the LCHF Keto diet Malayalam.

ലോ കാർബ് ഡയറ്റുകൾ ചെയ്യുന്നവരിൽ കണ്ടുവരുന്ന ഉയർന്ന കൊളസ്ട്രോളിന് കാരണമെന്ത്? അതിനുള്ള പരിഹാരമാർഗ്ഗങ്ങൾ എന്തൊക്കെയാണ്?

കീറ്റോ ഡയറ്റ് ചെയ്യുകയും ഒന്നോ രണ്ടോ മാസത്തിനുള്ളിൽ രക്തപരിശോധന നടത്തി അതിൽ ഉയർന്ന അളവിൽ LDL CHOLESTEROL അല്ലെങ്കിൽ BAD CHOLESTEROL കാണുകയും അതുമൂലം സംശയങ്ങൾ ചോദിച്ചത് കൊണ്ടാണ് എല്ലാവരുടെയും അറിവിലേക്കായി ഇതിൻറെ വിശദാംശങ്ങൾ പങ്കുവയ്ക്കുന്നത്.

LCHF-KETO DIET ചെയ്യുന്നവർ ഏതാനും ചില യൂട്യൂബ് വീഡിയോകൾ മാത്രം കണ്ടതിനുശേഷം സ്വന്തം ഇഷ്ടപ്രകാരം ഡയറ്റ് ചെയ്യുമ്പോൾ ആണ് ഇത്തരം പ്രശ്നങ്ങൾ കണ്ടുവരുന്നത്. ഇത്തരം ഡയറ്റുകൾ ചെയ്യുമ്പോൾ അതിനെ കുറിച്ച് വ്യക്തമായി പഠിക്കുകയും മനസ്സിലാക്കുകയും ചെയ്യേണ്ടതുണ്ട്. അങ്ങനെ കൃത്യമായ പ്രൊഫഷണൽ ഗൈഡൻസ് ഇല്ലാതെ ഡയറ്റ് ചെയ്യുന്നവർ രക്തത്തിൽ ഉയർന്ന അളവിൽ കൊളസ്ട്രോൾ കാണുമ്പോൾ ഉടനെ തന്നെ ഡോക്ടറെ സമീപിക്കുകയും ഡോക്ടർ കുറിച്ച് കൊടുക്കുന്ന മരുന്നു കഴിക്കാൻ ആരംഭിക്കുകയും ചെയ്യുന്നു.സത്യത്തിൽ ഇപ്രകാരം രക്തപരിശോധന നടത്തി ഡോക്ടറെ സമീപിക്കുന്നവർ പൂർണ്ണമായും തെറ്റായ ഇൻഫർമേഷൻ ആണ് ഡോക്ടർക്ക് നൽകുന്നത്. കയ്യിലുള്ള ക്ലിനിക്കൽ ഡയഗ്നോസിസിന്റെ അടിസ്ഥാനത്തിൽ മരുന്ന് കുറിച്ചു കൊടുക്കുകയും രോഗി അനവസരത്തിൽ മരുന്ന് കഴിക്കാൻ ആരംഭിക്കുകയും ചെയ്യുന്നു. ഇത്തരം തെറ്റുകൾ ആരും ചെയ്യാതിരിക്കാൻ വേണ്ടിയാണ് നിങ്ങൾക്ക് വേണ്ടി വളരെ വിശദമായി കാര്യങ്ങൾ അവതരിപ്പിക്കുന്നത്.

ആദ്യം തന്നെ നിങ്ങൾ മനസ്സിലാക്കേണ്ട കാര്യം ഇത്തരം സന്ദർഭങ്ങളിൽ ഉടനെ നിങ്ങൾ മരുന്ന് കഴിച്ച് തുടങ്ങേണ്ടത് ഇല്ല . കാരണം നമ്മുടെ ലബോറട്ടറികളിൽ 75% കാർബോഹൈഡ്രേറ്റ് അഥവാ അന്നജം അടങ്ങിയ ഭക്ഷണ രീതി പിന്തുടരുന്നവരുടെ ക്ലിനിക്കൽ റിസർച്ചിൻറെ ഭാഗമായി ഉണ്ടാക്കിയ നോർമൽ വാല്യൂകളാണ് ലഭ്യമായിട്ടുള്ളത്.കീറ്റോ ഡയറ്റ് പിന്തുടരുന്നവരെ അടിസ്ഥാനമാക്കിയുള്ള പ്രത്യേക പഠനങ്ങളോ ലബോറട്ടറി റിസൾട്ടുകളോ നോർമൽ വാല്യൂസോ ഇന്നുവരെ ഉണ്ടായിട്ടില്ല. അതുകൊണ്ടുതന്നെ ഇത്തരം ഡയറ്റുകളെ കുറിച്ച് നന്നായി അറിയുകയും റിസർച്ച് ചെയ്യുകയും ചെയ്യുന്നവരുടെ അഭിപ്രായങ്ങൾ അറിയേണ്ടതുണ്ട്. കൃത്യമായ വിവരങ്ങൾ അറിയാത്തത് മൂലം തെറ്റായ രീതിയിൽ ഡയറ്റ് ചെയ്തു ഗുരുതരമായ പാർശ്വഫലങ്ങളിലേക്ക് ആരും പ്രവേശിക്കരുത്.

HDL, ട്രൈഗ്ലിസറൈഡ്സ് എന്നിവയുടെ മൂല്യങ്ങൾ ആണ് നിങ്ങൾ കൂടുതൽ പരിഗണിക്കേണ്ടത്. എപ്പോഴും Total കൊളസ്ട്രോൾ മാത്രം പരിശോധിച്ചിട്ട് കൃത്യമായ ഫലം ഉണ്ടാകില്ല. Lipid Profile എന്നറിയപ്പെടുന്ന Complete cholesterol profile test ചെയ്താൽ മാത്രമേ Total കൊളസ്ട്രോളിനെ നമുക്ക് വ്യാഖ്യാനിക്കാൻ സാധിക്കുകയുള്ളൂ. പൊതുവേ ഡയറ്റ് ചെയ്യുന്ന ആളുകൾ Total കൊളസ്ട്രോൾ പരിശോധിച്ച് കൊളസ്ട്രോൾ ഉയർന്ന അളവിൽ ആയി എന്ന് പരാതിപ്പെടാറുണ്ട്.മറ്റു റിസൾട്ടുകൾ എല്ലാം മികച്ചതായി നിൽക്കുമ്പോഴും എന്തുകൊണ്ട് എനിക്ക് കൊളസ്ട്രോൾ മാത്രം ഇങ്ങനെ ഉയർന്ന അളവിൽ നിൽക്കുന്നു എന്ന് പലരും ചോദിക്കുന്നു. മുകളിൽ പറഞ്ഞതുപോലെ പോലെ സാധാരണ ലബോറട്ടറികളിൽ ടോട്ടൽ കൊളസ്ട്രോൾ മാത്രം പരിശോധിക്കുമ്പോഴാണ് ഇത്തരം പ്രശ്നങ്ങൾ കണ്ടുവരുന്നത്.

LDL, VLDL ,ട്രൈഗ്ലിസറൈഡ് തുടങ്ങിയവ ഘട്ടംഘട്ടമായി പരിശോധിച്ച ശേഷം മാത്രമേ കൊളസ്ട്രോൾ മൂലം എന്തെങ്കിലും പ്രശ്നം വരാൻ സാധ്യതയുണ്ടോ എന്ന് വിലയിരുത്താൻ സാധിക്കുകയുള്ളൂ. LIPID PROFILE പരിശോധിക്കുമ്പോൾ ആ ഗ്രൂപ്പിൽ തന്നെ ഏറ്റവും മോശപ്പെട്ടതും ശരീരത്തിന് അത്യധികം ദോഷം ചെയ്യുന്നതുമായ കൊളസ്ട്രോൾ ആയി അറിയപ്പെടുന്നത് ട്രൈഗ്ലിസറൈഡ്സ് ആണ്. ട്രൈഗ്ലിസറൈഡ് എപ്പോഴും നോർമൽ വാല്യൂവിന് താഴെ തന്നെ നിൽക്കണം. HDL 40 നും 50 നും ഉള്ളിൽ എപ്പോഴും നിലനിർത്തണം. ഇവ രണ്ടും കൃത്യമാണെങ്കിൽ നമ്മൾ 90% വിജയിച്ചുകഴിഞ്ഞു.

LDL & HDL
ട്രൈഗ്ലിസറൈഡിനെ വച്ച് താരതമ്യം ചെയുമ്പോൾ LDL അത്ര മോശപ്പെട്ട ലിസ്റ്റിലുള്ള ചീത്ത കൊളസ്ട്രോൾ ആണെന്ന് പറയാനാകില്ല.. ലിവറിൽ ആണ് കൊളസ്ട്രോൾ ഉണ്ടാക്കുന്നത്. ഇങ്ങനെ ഉണ്ടാക്കപ്പെടുന്ന കൊളസ്ട്രോളിനെ ശരീരത്തിൻറെ മറ്റു ഭാഗങ്ങളിലേക്ക് എത്തിക്കുന്ന ഡ്യൂട്ടി ആണ് LDLനുള്ളത്. ലോ ഡെൻസിറ്റി ലിപ്പോ പ്രോട്ടീൻ എന്ന് അറിയപ്പെടുന്ന ലിപ്പോ പ്രോട്ടീനുകൾ അഥവാ വാഹകർ ആണ് ഇവ.ഇപ്രകാരം ശരീരത്തിലെ വിവിധ ഭാഗങ്ങളിൽ നിന്ന് ആവശ്യമില്ലാത്ത കൊളസ്ട്രോളിനെ തിരിച്ച് ലിവറിൽ എത്തിക്കുന്ന ലിപ്പോ പ്രോട്ടീനുകളാണ് HDL. (ഹൈ ഡെൻസിറ്റി ലിപ്പോ പ്രോട്ടീനുകൾ) .ഇപ്രകാരം ആവശ്യമില്ലാത്ത കൊളസ്ട്രോളിനെ തിരിച്ച് ലിവറിൽ എത്തിക്കുന്ന എച്ച് ഡി എല്ലിൽ കുറവുണ്ടാകാൻ പാടില്ല.കുറച്ചുകൂടി വ്യക്തമായി പറഞ്ഞാൽ നമ്മൾ ഒരാളെ ഒരു സ്ഥലത്ത് ഡ്രോപ്പ് ചെയ്യുകയും തിരിച്ചുകൊണ്ടു വരാതിരിക്കുകയും ചെയ്താൽ എന്തു സംഭവിക്കും? നമ്മുടെ നാട്ടിൽ സാധാരണയായി പറയാറുള്ളതുപോലെ വഴിയാധാരമായി പോകും. ഇതുതന്നെയാണ് എച്ച്ഡിഎൽ കൊളസ്ട്രോളിന്റെ കാര്യത്തിലും സംഭവിക്കുന്നത്. അതുകൊണ്ടാണ് എച്ച്ഡിഎൽ എപ്പോഴും 40 നും 50 നും ഇടയിൽ വേണം എന്നു പറയുന്നത്.

എന്താണ് LDL-A & LDL-B
ട്രൈഗ്ലിസറൈഡ് കുറവും എച്ച്ഡിഎൽ കൂടുതലും ആണെങ്കിൽ അതിനെ എൽഡിഎൽ – A എന്ന വിഭാഗത്തിൽ ഉൾപ്പെടുത്താം. ഈ സാഹചര്യത്തിൽ എൽഡിഎൽ വർധിച്ചിരുന്നാലും നിങ്ങൾ യാതൊരു തരത്തിലും ഭയപ്പെടേണ്ടതില്ല.അതേസമയം ട്രൈഗ്ലിസറൈഡിന്റെ അളവ് കൂടുതലും എച്ച്ഡിഎല്ലിന്റെ അളവ് കുറവും ആണെങ്കിൽ ഇത് LDL-B എന്ന വിഭാഗത്തിൽ ഉൾപ്പെടുത്താം. ഈ സാഹചര്യത്തിൽ നാം ഭയപ്പെടേണ്ടിയിരിക്കുന്നു.ഇത്തരക്കാർ പിന്തുടരുന്ന ഭക്ഷണരീതിയിൽ അടി മുതൽ മുടി വരെ മാറ്റം വരുത്തേണ്ടതുണ്ട്. നിലവിൽ എൽഡിഎൽ എന്ന കൊളസ്ട്രോൾ 300-350 ആകുന്നതല്ല യഥാർത്ഥ പ്രശ്നം. ഇത് എൽ ഡി എൽ- A അല്ലെങ്കിൽ എൽ ഡി എൽ – B ആണോ എന്ന് തിരിച്ചറിയുക എന്നതാണ് പരമപ്രധാനം. ഇത് തിരിച്ചറിയണമെങ്കിൽ ട്രൈഗ്ലിസറൈഡ് അളവ് കൂടുതൽ ആണോ എന്ന് പരിശോധിക്കണം. ട്രൈഗ്ലിസറൈഡിന്റെ അളവ് കൂടിയാൽ വളരെയധികം മുൻകരുതലുകളെടുക്കണം. ട്രൈഗ്ലിസറൈഡിന്റെ അളവ് കുറഞ്ഞാൽ അവിടെ യാതൊരു പ്രശ്നവും നിലനിൽക്കുന്നില്ല.എൽ ഡി എൽ – A എന്ന സാഹചര്യത്തിൽ LDLന്റെ അളവ് വർദ്ധിക്കുന്നതിൽ ഭയപ്പെടേണ്ടതില്ല. എൽഡിഎൽ 300 വരെ ആയാലും കുഴപ്പമില്ല. LDL-A saturated fatലൂടെയാണ് ലഭ്യമാകുന്നത്. (വെളിച്ചെണ്ണ ,ശുദ്ധമായ ഒലിവ് ഓയിൽ മുതലായവ).

എൽഡിഎൽ – B അപകടകാരിയാണ്. അതിൻറെ പ്രധാനഘടകം മധുരമാണ്. മധുരവും ഉയർന്ന കൊഴുപ്പും ചേർന്ന ഭക്ഷണ രീതി. അതായത് അമിത കൊഴുപ്പുള്ള ഭക്ഷണങ്ങളുടെ കൂടെ ഉയർന്ന അളവിൽ മധുരമോ അല്ലെങ്കിൽ അന്നജം അതായത് കാർബോഹൈഡ്രേറ്റോ കലർത്തിയുള്ള ഭക്ഷണരീതി. ഇത്തരം ശീലങ്ങളെ നമ്മുടെ ദൈനംദിന ജീവിതത്തിൽ നിന്ന് മാറ്റിയെടുക്കേണ്ടതുണ്ട്.ഭക്ഷണത്തിൽ പഞ്ചസാരയുടെ അല്ലെങ്കിൽ ഗ്ലൂക്കോസിന്റെ അളവ് കൂടുതൽ ഉൾപ്പെടുത്തുന്നവർ, ശരീരത്തിൽ എന്തെങ്കിലും തരത്തിലുള്ള inflammation ഉള്ളവർ , തൈറോയ്ഡ് കുറവുള്ളവർ , വെളിച്ചെണ്ണയോ ഒലീവ് ഓയിലോ അല്ലാതെ മറ്റ് എണ്ണകൾ ഉപയോഗിക്കുന്നവർ തുടങ്ങിയ കാറ്റഗറിയിലുള്ള ആളുകൾക്ക് എൽഡിഎൽ – B വരാനുള്ള സാധ്യത കൂടുതലാണ്. അതുപോലെ ട്രാൻസ്ഫാറ്റ് അതായത് വെളിച്ചെണ്ണയോ ഒലീവ് ഓയിലോ ആണെങ്കിലും ഒരിക്കൽ പാചകം ചെയ്ത എണ്ണ വീണ്ടും വീണ്ടും ചൂടാക്കി ഉപയോഗിക്കുന്നത് LDL-B വർദ്ധിക്കാൻ ഇടയാക്കും.

കീറ്റോജെനിക് പോലെയുള്ള ലോ കാർബ് ഡയറ്റുകൾ പിന്തുടരുന്ന പലരും ഇതുപോലെ പാചകം ചെയ്ത എണ്ണ വീണ്ടും വീണ്ടും ചൂടാക്കുമ്പോൾ അവർക്കും എൽ ഡി എൽ ബി വരാനുള്ള സാധ്യതയുണ്ട്. വൈറ്റമിൻ സി യുടെ അഭാവം എൽഡിഎൽ ബിയിലേക്ക് നയിക്കും. അതുകൊണ്ടാണ് നാരങ്ങാ വെള്ളം പോലെയുള്ള ജ്യൂസുകൾ കുടിക്കാൻ ഡയറ്റിൽ നിർദ്ദേശിക്കുന്നത്.അമിതമായ കാർബോഹൈഡ്രേറ്റ് അടങ്ങിയിട്ടുള്ള ഭക്ഷണങ്ങൾ ബേക്ക് ചെയ്തു കഴിക്കുന്നതും അപകടകരമാണ്. ഉദാഹരണത്തിന്, ഡോണട്ട്സ്, സ്വീറ്റ് സോസ് ചേർത്ത് ബേക്ക് ചെയ്തവ. ഫ്രക്ടോസ് പോലെയുള്ള കോൺ സിറപ്പുകൾ ചേർത്ത ബേക്കറി മധുരപലഹാരങ്ങൾ. ചുരുക്കി പറഞ്ഞാൽ ഉയർന്ന കാർബോഹൈഡ്രേറ്റും ഉയർന്ന കൊഴുപ്പും അപകടകരമാണ്. അതുപോലെതന്നെ ഉയർന്ന കാർബോഹൈഡ്രേറ്റും ഉയർന്ന പ്രോട്ടീനും അപകടകരമാണ്. സർജറി കഴിഞ്ഞ ആളുകൾ , ആക്സിഡന്റിനു ശേഷം ട്രോമ അവസ്ഥ നേരിടുന്നവർ തുടങ്ങിയവർക്കും LDL-B വരാനുള്ള സാധ്യത അധികമാണ്.

രക്തത്തിൽ HDL വർദ്ധിപ്പിക്കുവാനായി ചെയ്യേണ്ട കാര്യങ്ങൾ .

  1. 30 മുതൽ 40 മിനിറ്റ് വരെ ദിവസവും നടക്കുക അല്ലെങ്കിൽ വ്യായാമം ചെയ്യുക.
  2. പാചകം ചെയ്യുമ്പോൾ വെളിച്ചെണ്ണ അല്ലെങ്കിൽ ശുദ്ധമായ ഒലിവ് ഓയിൽ ഉപയോഗിക്കുക.
  3. Salmon പോലെയുള്ള ഉയർന്ന കൊഴുപ്പുള്ള മത്സ്യങ്ങൾ കഴിക്കുക.
  4. വെണ്ണപ്പഴം (Avocado), ഫ്ലാക്സ് സീഡ്, അണ്ടി വർഗ്ഗങ്ങൾ (Nuts) തുടങ്ങിയവ ഭക്ഷണത്തിൽ ഉൾപ്പെടുത്തുക.
  5. Omega-3 ഫാറ്റി ആസിഡ് അടങ്ങിയിട്ടുള്ള സപ്ലിമെന്റുകൾ കഴിക്കാവുന്നതാണ്.
  6. കീറ്റോജെനിക് പോലെയുള്ള ലോ കാർബ് ഡയറ്റുകൾ പിന്തുടരുന്നതിലൂടെ HDL വർദ്ധിപ്പിക്കാൻ സഹായിക്കും.
  7. Egg – Omega 3 Eggs, ഫിഷ് ലിവർ ഓയിൽ, ഡാർക്ക് ചോക്കലേറ്റ്, Full Fat Yogurt മുതലായ ഭക്ഷണങ്ങൾ എല്ലാം എച്ച്ഡിഎൽ വർദ്ധിപ്പിക്കാൻ സഹായിക്കും.

ട്രൈഗ്ലിസറൈഡ്

ലിപിഡ് പ്രൊഫൈൽ എന്ന കൊളസ്ട്രോൾ ഗ്രൂപ്പിനകത്ത് അപകടകാരിയായി കരുതപ്പെടുന്ന ഒരു കൊളസ്ട്രോളാണ് ട്രൈഗ്ലിസറൈഡ്. കാരണം ട്രൈഗ്ലിസറൈഡുകൾ രക്തക്കുഴലിൽ പറ്റി പിടിക്കാനും ബ്ലോക്ക് ഉണ്ടാക്കാനും ഇടയാകുന്നു. ഹൃദയസംബന്ധമായ അസുഖങ്ങളിലേക്ക് ഇത് നയിക്കുന്നു. അതുകൊണ്ടുതന്നെ ട്രൈഗ്ലിസറൈഡ് എപ്പോഴും നോർമൽ റേഞ്ചിന് താഴെ തന്നെ നിലനിർത്തേണ്ടത് ആവശ്യമാണ്. അമിതമായ കാർബോഹൈഡ്രേറ്റ് അഥവാ അന്നജം അടങ്ങിയ ഭക്ഷണം കഴിക്കുമ്പോഴാണ് ട്രൈഗ്ലിസറൈഡിന്റെ അളവ് ഉയരുന്നത്.

കൃത്യമായ വ്യായാമമുറകൾ പിന്തുടരാത്തവർക്ക് HDL ന്റെ അളവു കുറയുന്നു. എച്ച്ഡിഎൽ വർധിപ്പിക്കാനായി ആയി കൃത്യമായ വ്യായാമമുറകൾ പിൻതുടരുകയും നല്ല കൊഴുപ്പ് കഴിക്കുകയും വേണം. സസ്യ എണ്ണകൾ അഥവാ ട്രാൻസ്ഫാറ്റുകൾ ധാരാളം ചേർത്തിട്ടുള്ള ഹോട്ടൽ ഭക്ഷണങ്ങൾ കൂടുതൽ കഴിക്കുന്നവരിലാണ് എച്ച്ഡിഎൽ കുറയുന്നതായി കണ്ടുവരുന്നത്.

ഒരിക്കൽ പാചകം ചെയ്ത എണ്ണയിൽ തന്നെ വീണ്ടും വീണ്ടും പാചകം ചെയ്യുമ്പോൾ അതായത് ഒരിക്കൽ ചൂടാക്കിയ എണ്ണ പലപ്രാവശ്യം വീണ്ടും ചൂടാക്കുമ്പോൾ പലതരത്തിലുള്ള കെമിക്കൽ റിയാക്ഷനുകൾ സംഭവിക്കുകയും അവയിൽ ട്രാൻസ്ഫാറ്റ് അപകടകരമായ രീതിയിൽ വർദ്ധിക്കുകയും ചെയ്യുന്നു. ഇത്തരം കൊഴുപ്പുകൾ രക്തത്തിൽ പ്രവേശിച്ചാൽ അതിനെ രക്തത്തിൽനിന്ന് വേർതിരിക്കുക ശ്രമകരമാണ്.

ചുരുക്കിപ്പറഞ്ഞാൽ രക്തത്തെ തിളപ്പിച്ചാൽ പോലും ഇവ ഉരുകുക പ്രയാസമാണ്. അതുകൊണ്ടാണ് ട്രാൻസ്ഫാറ്റുകൾ കഴിക്കരുത് എന്ന് പറയുന്നത്. ഉയർന്ന ചൂടിൽ പാചകം ചെയ്യുന്ന എണ്ണകളും പുറത്തുനിന്നുള്ള ഭക്ഷണങ്ങളും നിയന്ത്രിക്കുകയും കൃത്യമായ വ്യായാമമുറകൾ പിന്തുടരുകയും ചെയ്യുന്നവർക്ക് മാത്രമാണ് ആരോഗ്യം നിലനിർത്താൻ സാധിക്കുക.

കൊഴുപ്പിനെ കുറിച്ച് എല്ലാവരുടെയും ഇടയിൽ ധാരാളം തെറ്റിദ്ധാരണകൾ നിലനിൽക്കുന്നു.എങ്ങനെയാണ് നാം കൊഴുപ്പ് ഉപയോഗിക്കേണ്ടത് ?

ഒരുപാട് ആളുകൾ രാവിലെ വെറും വയറ്റിൽ ഒരു സ്പൂൺ വെണ്ണയോ ഒരു സ്പൂൺ നെയ്യോ കഴിക്കുന്നുണ്ട്. അതുകൊണ്ടൊന്നും ആരുടേയും കൊളസ്ട്രോൾ കൂടുന്നില്ല. ഇതിൻറെ കൂടെ മധുരമുള്ള ചായയും അല്ലെങ്കിൽ ധാരാളം മധുരമുള്ള മറ്റെന്തെങ്കിലുമോ കഴിക്കുമ്പോഴാണ് ചീത്ത കൊളസ്ട്രോൾ വർധിക്കുന്നത്. അമിത മധുരമുള്ള യാതൊന്നും തന്നെ നമ്മുടെ ശരീരത്തിന് ഒട്ടും യോജിക്കുന്നതല്ല.

അതുപോലെതന്നെ അമിത അളവിൽ അന്നജം ഉള്ള ഭക്ഷണങ്ങൾ കഴിക്കുമ്പോൾ ഈ അന്നജത്തെ ശരീരം കൊഴുപ്പ് ആയി മാറ്റുന്നു എന്ന വസ്തുത പലരും അറിയുന്നില്ല. ഇൻസുലിൻ എന്ന ഹോർമോൺ നമ്മുടെ ശരീരത്തിൽ അമിതമായി ഉത്പാദിപ്പിക്കപ്പെടുന്ന സാഹചര്യത്തിൽ ഫാറ്റ് ഒരിക്കലും ദഹിക്കുന്നില്ല.

ഇൻസുലിൻ റെസിസ്റ്റൻസിനെ നിയന്ത്രിക്കാനുള്ള മാർഗങ്ങൾ ആണ് ഇൻറർമിറ്റന്റ് ഫാസ്റ്റിംഗ് , നല്ല ഉറക്കം, സ്ഥിരമായ വ്യായാമം,ചിട്ടയുള്ള ജീവിതചര്യ ,ഡയറ്റ് ചെയ്യുന്നവർ എപ്പോഴും പ്രൊഫഷണൽ ഗൈഡൻസോടു കൂടെ ഡയറ്റ് ചെയ്യുന്നതാണ് ഏറ്റവും നല്ലത്. പിന്തുടരാൻ പോകുന്ന ഡയറ്റിനെ കുറിച്ച് വ്യക്തമായ അറിവ് വേണം.

ഇതെല്ലാം ഔട്ട് ഓഫ് സിലബസ് കാര്യങ്ങളാണ്. റിയാലിറ്റിയിൽ നിന്നു മാത്രമാണ് ഇത്തരം കാര്യങ്ങൾ നമുക്ക് മനസ്സിലാക്കാൻ സാധിക്കുകയുള്ളൂ. ഒരു ഡയറ്റ് ചെയ്യുമ്പോൾ അതിൻറെ പാർശ്വഫലങ്ങൾ എന്തൊക്കെയാണ് അത് തെറ്റിച്ചു കഴിഞ്ഞാൽ ചെയ്യേണ്ട പരിഹാരമാർഗ്ഗങ്ങൾ എന്തൊക്കെയാണ് ഓരോരുത്തർക്കും അനുയോജ്യമായ ഡയറ്റ് ഏതാണ് എന്നൊക്കെ കൃത്യമായി മനസ്സിലാക്കണം.

Fever Diet food menu preparation

Fever Diet food menu preparation

Food Menu for Fever and cold during the period of Diet.

പനി, ജലദോഷം അല്ലെങ്കിൽ കൊറോണ പോലെയുള്ള എന്തെങ്കിലും പകർച്ചവ്യാധികളോ വൈറൽ പനിയോ വരുമ്പോൾ കീറ്റോ ഡയറ്റ് ചെയ്യുന്നവർ എന്തു തരം ഭക്ഷണമാണ് കഴിക്കേണ്ടത്.?

ശരീരം അമിതമായി ചൂടാകുമ്പോൾ നമ്മുടെ ശരീരത്തിന് കൂടുതൽ ഊർജ്ജം ആവശ്യമായി വരുന്നു. അതായത് നമ്മൾ സാധാരണ കഴിക്കുന്നതിനേക്കാൾ 600 മുതൽ 1200 കലോറി കൂടുതൽ ഭക്ഷണം കഴിക്കണം എന്ന് തന്നെയാണ് RDA നിർദ്ദേശിക്കുന്നത്.

പ്രോട്ടീൻ
100 കിലോ ഗ്രാം ഭാരം ഉള്ള വ്യക്തി 100 ഗ്രാം പ്രോട്ടീൻ കഴിക്കണം എന്നാണ് പറയപ്പെടുന്നത്.
എന്നാൽ മുതിർന്ന ആളുകൾക്ക് നീണ്ടു നിൽക്കുന്ന പനിയുണ്ടെങ്കിൽ അവർ പ്രോട്ടീൻ കൂടുതൽ കഴിക്കണം എന്നാണു RDA നിർദ്ദേശിക്കുന്നത്. എന്നാൽ പനിയുള്ളപ്പോൾ മാംസാഹാരങ്ങളോടോ വറുത്തതും പൊരിച്ചതുമായ ഭക്ഷണപദാർഥങ്ങളോടോ താൽപര്യം ഉണ്ടായിരിക്കുകയില്ല. അതുകൊണ്ടുതന്നെ ഉയർന്ന അളവിൽ പ്രോട്ടീൻ ഉൾക്കൊള്ളുന്ന പാനീയങ്ങൾ ഇത്തരം സന്ദർഭങ്ങളിൽ കുടിക്കാവുന്നതാണ്.

കാർബോഹൈഡ്രേറ്റ്
അടുത്തതായി കാർബോഹൈഡ്രേറ്റ് അഥവാ അന്നജത്തിന്റെ അളവാണ്. കട്ടികുറഞ്ഞ കഞ്ഞി പോലെയുള്ള ഭക്ഷണങ്ങളാണ് ഈ സമയത്ത് ഉത്തമം. ഗോതമ്പിന്റെ ബ്രെഡ് മുതലായവ കഴിക്കാവുന്നതാണ്. മധുരം കുറഞ്ഞതും രക്തത്തിൽ പെട്ടെന്ന് ആഗിരണം ചെയ്യാൻ കഴിയുന്നതുമായ അന്നജങ്ങൾ ഉൾക്കൊള്ളിക്കുന്നതാണ് ഉത്തമം.

കൊഴുപ്പ്
ഫാറ്റ് അഥവാ കൊഴുപ്പിൻറെ ഉപയോഗം ഈ സമയത്തു പരിമിതപ്പെടുത്തണം. കൊഴുപ്പിൽ ധാരാളം കാലറി ഉണ്ടെങ്കിലും ദഹനത്തെ തടസ്സപ്പെടുത്തും എന്നതിനാൽ പരമാവധി കുറക്കണം.

മിനറൽസ് അഥവാ ധാതുലവണങ്ങൾ
മിനറൽസിൻറെ ലഭ്യതക്കു വേണ്ടി കറിയുപ്പ്, ഇന്തുപ്പ്, കല്ലുപ്പ് തുടങ്ങിയവ സൂപ്പുകളിലും മറ്റും ചേർത്ത് കഴിക്കാം. പാലിലും പഴച്ചാറിലും ധാരാളം ധാതുക്കൾ ഉള്ളതിനാൽ അതും ഈ സമയത്തു കുടിക്കാവുന്നതാണ് .

വൈറ്റമിൻസ്
വൈറ്റമിൻ എ & ബി അടങ്ങിയിട്ടുള്ള ഭക്ഷണങ്ങൾ കൂടുതൽ കഴിക്കാം. ആൻറിബയോട്ടിക് കഴിക്കുമ്പോൾ വൈറ്റമിൻ ബിയുടെ കുറവ് വരാനുള്ള സാധ്യത ഉണ്ട്. അതിനാൽ വൈറ്റമിൻ ബി സപ്ലിമെൻറ് എടുക്കാവുന്നതാണ്.

നന്നായി വേവിച്ച് കുറുകിയ ആഹാരങ്ങൾ കഴിക്കുന്നതാണ് കൂടുതൽ നല്ലത്. പച്ചക്കറികളും ധാന്യ വർഗ്ഗങ്ങളും അന്നജം അടങ്ങിയ ഏതു ഭക്ഷണമാണെങ്കിലും നന്നായി വേവിച്ച് കുറുകി കഴിക്കുന്നതാണ് ഉത്തമം. പെട്ടെന്ന് ദഹിക്കാൻ വേണ്ടിയാണ് ഇങ്ങനെ ചെയ്യാൻ പറയുന്നത്. അതുപോലെ അളവു കുറച്ചുകൊണ്ട് ഇടവിട്ട സമയങ്ങളിൽ ഭക്ഷണം കഴിക്കുന്നതാണ് നല്ലത്.

വെള്ളം
രണ്ടര മുതൽ അഞ്ചു ലിറ്റർ വരെ വരെ വെള്ളം ഈ സമയത്ത് നമുക്ക് ആവശ്യമാണ്. നമ്മൾ കുടിക്കുന്ന സാധാരണ വെള്ളവും സൂപ്പുകളും കുറുക്കിയ ഭക്ഷണവും എല്ലാം ചേർത്താണ് ഈ അളവ് .

ഉൾക്കൊള്ളിക്കേണ്ട ഭക്ഷണ പദാർത്ഥങ്ങൾ
പഴച്ചാറുകൾ, നാളികേര വെള്ളം, ബാർലി വെള്ളം, പാൽ, പരിപ്പ്, പച്ചക്കറികൾ, വേവിച്ചമത്സ്യം , ധാന്യങ്ങൾ, മുട്ട, തൈര്…….

ഒഴിവാക്കേണ്ടവ
വെണ്ണ, നെയ്യ്, വെജിറ്റബിൾ ഓയിൽ, വറുത്തതും പൊരിച്ചതുമായ ഭക്ഷണങ്ങൾ, സ്പൈസി ഫുഡ്…..

കസ്റ്റമൈസ്ഡ് പ്ലാനുകൾ
വ്യക്തികളുടെ അടിസ്ഥാനത്തിൽ കസ്റ്റമൈസ് ചെയ്ത പ്ലാനുകൾ ആവശ്യമുള്ളവർ ഞങ്ങളുടെ വെബ്സൈറ്റ് വഴി വാട്സാപ്പിൽ കോൺടാക്ട് ചെയ്യാവുന്നതാണ്.

×

Hello!

Click one of our contacts below to chat on WhatsApp

× Contact us